QR Parlamenti Májilisiniń depýtaty Maira Aisina halyqqa qyzmet kórsetý ortalyqtarynyń jańa qyzmet kórsetý tásilderin túsindirdi, dep habarlaidy "Ult aqparat".
Jańa ózgerister «QR keibir zańnamalyq aktilerine memlekettik qyzmetter kórsetý máseleleri boiynsha ózgerister men tolyqtyrýlar engizý týraly» Zańynda kórsetilgen.
«Memlekettik qyzmet kórsetý salasyndaǵy basty jańalyqtardyń biri – halyqqa qyzmet kórsetý ortalyqtarynyń «bir terezeden» «bir ótinish» qaǵidatyna kóshýi. Bul «kompozittik» qyzmet kórsetý tásili dep atalady. Iaǵni azamattar bir ótinishpen birneshe ilespe qyzmetti keshendi túrde ala alady. Mysaly, múgedek balasy bar ata-analar balasyna meditsinalyq qyzmet nemese memleketten beriletin dári-dármek alý úshin 6 túrli aryz jazady eken. Endigi ýaqytta onyń sany qysqaryp, bir ótinish arqyly birneshe qyzmetti bir mezette alý múmkindigi bar», - dedi depýtat QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, bul jańa tásil elimizdiń barlyq HQO-larynda pilottyq rejimde synaqtan ótken.
«Sondai-aq, jańa ózgerister qatarynda memlekettik qyzmetterdi proaktivti túrde kórsetý qarastyrylǵan. Iaǵni, HQO azamattyń ótinish berýin kútpei-aq, qyzmetterdi ózi usynady. Mysaly, sábi dúniege kelgende ony esepke alý, týý týraly kýálik berý, balaǵa beriletin járdemaqyǵa ótinish jáne náresteni turǵylyqty mekenjaiy boiynsha tirkeý sekildi qyzmetter avtomatty túrde bir mezette usynylady. Bul qyzmet búginde 120 myń anaǵa kórsetildi», - dedi M. Aisina.
QR Tsifrlyq damý, innovatsiialar jáne aeroǵarysh ónerkásibi ministrliginiń derekterine sáikes, búginde elimizde 124 memlekettik qyzmet ońtailandyryldy. Orta eseppen árbir memlekettik qyzmettiń kórsetilý merzimi 9 kúnge deiin qysqartyldy. Sonymen birge, 90-nan astam qujat qysqartylyp, 82 memlekettik qyzmet kompozitti túrde berilmek.
Aita keteiik, 2019 jyldyń 7 qarashasynda Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine memlekettik qyzmetter kórsetý máseleleri boiynsha ózgerister men tolyqtyrýlar engizý týraly» Zańy qabyldandy. Zań jobasy Qazaqstan Respýblikasynyń memlekettik kórsetiletin qyzmetter salasyndaǵy zańnamasyn jetildirý maqsatynda ázirlendi.
