Isi qazaqqa tanymal, sanańa oi salar «Ne paida» atty talǵamdy ánniń mátininde: «Bul ómirden ne paida, halqyńa qyzmet etpeseń» degen joldar bar. Iá, shyndyǵynda da Otanyń, halqyńa, týǵan jerińe iile qyzmet etpeseń, qur súldeni kóterip, jer basyp júrgennen ne paida, ne ǵarip.
Týǵan elge qyzmet etýdiń eń asqaraly shyńy el tynyshtyǵyn qorǵaý ekeni ras. Egemendiktiń birden-bir kúretamyry bolyp sanalatyn ishki qaýipsizdikti qamtamasyz etýge senimdi úlesin qosyp júrgen Ulttyq ulandyq qyzmetkerdiń eńbegi de paryqty hám abyroily.
Búgingi qalam tartar maqalamyz boiyndaǵy qairat pen jigerin, bilimi men qajyrly eńbegin el tynyshtyǵyn qamtamasyz etýge arnaǵan bilikti ofitserdiń biri podpolkovnik Farhad Atyǵaev jaily bolmaq.
1999 jyly orta mektepti támamdaǵan soń óziniń bala kúngi armany Ulttyq ulannyń Petropavl qalasyndaǵy Áskeri institýtyna qujattaryn tapsyryp, oqýǵa túsedi. Áskeri bilim ordasyn bitirgennen keiin ofitserlik qyzmet jolyn týǵan qalasy Almatydaǵy 5571 áskeri bóliminde vzvod komandirliginen bastady.
Jas leitenant munda tájiribe jinaqtady. Bir jyldan soń Farhad Atyǵaev Almaty oblysy Qarakemer kentindegi 6654 áskeri bólimine aýystyryldy. Atalǵan oqý polkynda áskeri jasaq bastyqtaryn daiarlaýshy oqý protsesinin basqarǵan ol osynda bas-aiaǵy 4 jyldan astam ýaqyt qyzmet atqardy.
Munda Farhad tolysty, kemeldendi. Qarymdy qabiletimen qýantyp, iskerligimen súisindirip, uiymdastyrý isindegi utqyrlyǵymen, qiyn sáttegi tapqyrlyǵymen erekshelendi.
2009 jyldyń sońynan bastap 7552 áskeri bóliminde jaýyngerlik daiarlyq qyzmetinde jaýapty laýazymdarda atqardy. Al 2016 jyldan bastap Ulttyq ulan «Ońtústik» óńirlik qolbasshylyǵynyń ásker qyzmeti jáne qyzmet qaýipsizdigi bóliminiń aǵa ofitseri laýazymyna taǵaiyndaldy.
Qyzmetine qashanda jaýapkershilikpen qarap, talap pen sapaly nátijelerge joǵary kóńil bóletin ofitser búginde «Ońtústik»óńirlik qolbasshylyǵynda úzdik ofitserlerdiń sabynda. Áskeri jarǵy talaptary men tártiptiń qatań saqtalyp, áskerdegi óskeleń urpaqtyń boiynda otansúigishtik rýhtyń shyńdalýyna eleýli úlesin qosyp keledi. Ári ofitserler men serjant, praporshikter, qatardaǵy jaýyngerler arasynda keleńsiz oqiǵalardy boldyrmaý jolynda bilek túre eńbek etýde. Áskeri bólimderdiń qyraǵy kúzetin uiymdastyrýdaǵy Farhad Atyǵaevtyń eńbegi de aitarlyq.
«Qazirgi tańda álemdegi kez kelgen eldiń aldynda turǵan eń úlken mindet ol lańkestiktiń aldyn alý, ári odan halqynyń qaýipsizdigin bekem qorǵai bilý dep aitsaq, qatelese qoimaspyz. Alys-jaqyn shetelderde bolyp jatqan jarylystar kim-kimdi de oilandyrmai qoimasy anyq.
Keide teledidar, basylym betterinen áldebir asa qaýipti sodyrdyń Qazaqstan jerinde ustalyp, birde Reseige, birde Ózbekstanǵa, birde basqa da alys-jaqyn shetelderge ekstraditsiialanyp jatqandyǵyn estigende es jiyp qalatynymyz bar. Sonda ǵana Qazaqstannyń dúniejúzilik qaýymdastyqtyń bir bólshegi, barshaǵa tónip turǵan qaýip-qaterdiń ortaq ekendigin ańǵarasyń.
Jeke adam men azamattyń konstitýtsiialyq quqyǵyn, qaýipsizdigin, Qazaqstan qoǵamynyń qundylyqtaryn, memleket turaqtylyǵy men el tynyshtyǵyn qaýip-qaterlerden jan-jaqty qorǵaý jolyndaǵy Ulttyq ulan áskeri qyzmetshilerine zor jaýapkershilikter júktelip otyr.
Árine, osy ýaqyt aralyǵynda qol jetkizgen biikter kóp. Biraq onymen toqtap qalýǵa bolmaidy, jeke quram árdaiym izdenis ústinde bolsa ǵana ol óziniń kásibiligin arttyra beretindigi sózsiz. Sondyqtanda bizdiń qyzmetimiz áskeri bólimderdegi qyzmettiń qaýipsizdigine, onyń qorǵanysyna tikelei jaýapty bolǵandyqtan atqarylar sharýaǵa úlken jaýapkershilikpen kelemiz. Bizdiń ár áskeri qyzmetshimizge qoiylar talap joǵary. Sondyqtan da qaýipsizdikti qamtamasyz etý sharalaryn pysyqtaýǵa, ony jeke quramǵa úiretý, ári oqý-jattyǵý sharalaryn udaiy uiymdastyryp otyrýǵa jii kóńil bólemiz»,- deidi ol
Iá, ár adamnyń mańdaiyna jazǵan qysqa ǵumyrynda óziniń búkil jan-dúniesimen, bolmys bitimimen tańdaǵan súiikti mamandyǵy bolatyny anyq. Jan-júregimen qalaǵan kásibin tereń igergen ondai azamattar qashanda qurmet biiginde ekeni ras. Bul jaǵynan kelgende keiipkerimiz mamandyq tańdaýda qatelespegenin aitady. Halyqqa qyzmet etýden artyq shyń joq deidi. Minsiz áskeri qyzmeti jolynda talai marapat pen maqtaýlarǵa ie bolǵan eken.
Jan-jary Gúnsham ekeýi Álihan esimdi uldaryn ónegeli ósirip keledi. «Ákege qarap ul óser», - deidi. Osy ulymda óse kele meniń meniń jolymdy qýasa eken», deidi otaǵasy. Olai bolsa, bizde óz kezegimizde Farhadqa biikten kórine berýine tilektestik tanytyp, armandaryna jetýine niet bildiremiz. Alar asýlaryń kóp bolǵai alǵadai azamat.
Maior Arman ÁÝBÁKIROV,
Qazaqstan Respýblikasy Ulttyq ulany,
Almaty qalasy
