QR Aqparat jáne qoǵamdyq damý ministri Dáýren Abaev Áskeri mindetti azamattardy shaqyrýǵa qatysty pikir bildirdi, dep habarlaidy QazAqparat.
«Áskeri mindetti azamattardy shaqyrý týraly taǵy da aityp ketsek. Bul jańalyqqa bailanysty týyndaǵan suraqtardy túsinemiz. Búgin Qorǵanys ministri bul sharanyń qalai júzege asatyny týraly tolyq túsindirdi», - dep toqtaldy ministr «Habar 24» telearnasynyń tikelei efirinen.
Osy rette ol memleket basshylyqqa alatyn qaǵidattar týraly aitty:
- Birinshiden, qajet bolǵan jaǵdaida ǵana shaqyrý. Memleket kúshi jetkilikti jerlerge áskeri mindetti adamdar shaqyrylmaidy;
- Ekinshiden, óz erkimen baratyn adamdarǵa basymdyq beriledi;
Qabyldaý kezinde jasy, otbasylyq jaǵdaiy, densaýlyq jaǵdaiy siiaqty barlyq faktorlar eskeriledi. Jumys isteýshilerdiń jalaqysy saqtalady. Jumyssyz azamattarǵa tólemder bolady.
«Qyzmette táýlik boiy bolý qajet emes. Jumys kúni aiaqtalǵannan keiin úiine qaitady. Sózsiz, olardyń barlyǵy meditsinalyq baqylaýdan ótedi jáne qorǵanys quraldarymen qamtamasyz etiledi. Búginniń ózinde birqatar azamattar Otanǵa qyzmet etýge daiyn ekendigin bildirdi. Osy tusta, sol azamattarymyzǵa alǵys aitamyn. Eldiń qorǵany men maqtanyshy – Ózderińiz. Sonymen birge, qazir kóptegen azamattardy el qorǵany deýge tolyq negiz bar. Olar: virýspen kúresip jatqan – dárigerler. Muqtaj jandarǵa kómek berip júrgen – volonterler. Kúnine júzdegen maska tigip jatqan tiginshiler. Karantin rejiminiń saqtalýyn baqylap júrgen politsiia qyzmetkerleri. Antiseptik shyǵaryp jatqan zaýyt jumysshylary. Jedel-járdem júrgizýshileri. Mine, Prezidenttiń «Biz birgemiz!» degen uranynyń máni men maǵynasy da osynda. Ár adam óz isin adal atqaryp, ortaq problemany sheshýge atsalysady. Osylaisha, Otanǵa qyzmet etedi», - dedi Dáýren Abaev.
«Áskeri mindetti azamattardy shaqyrý degenimiz memleket problemalardy azamattar arqyly shesheiin dep jatyr degen sóz emes. Bul – adamdardy ózderiniń qaýipsizdigin qamtamasyz etýge barynsha keńinen tartý jónindegi konstitýtsiialyq shara», - dedi vedomstvo basshysy.
Eske sala keteiik, biyl 2 sáýir kúni Qazaqstan Prezidenti áskeri mindettilerdi arnaýly jiynǵa shaqyrý týraly jarlyq shyǵardy.
