QR Aqparat jáne qoǵamdyq damý ministri Dáýren Abaev tótenshe jaǵdai kezinde halyqqa áleýmettik qoldaý kórsetý mehanizmi týraly pikir bildirdi, dep habarlaidy QazAqparat.
«Búginde asa aýqymdy áleýmettik kómek paketi júzege asyrylýda. Bul másele Prezident Qasym-Jomart Toqaevtyń turaqty baqylaýynda. Árine, ázirge qorytyndy shyǵarýǵa erte, biraq jalpy alǵanda, az ýaqytta jaqsy nátijeler baiqaldy. Qoldaý kórsetý sanaty da óte keń kúrestiń aldyńǵy shebinde turǵan meditsina mamandary, biznes, egin egýdi bastaǵan agrariiler, qiyn jaǵdaida qalǵan azamattar qamtyldy. Ózderińiz jaqsy bilesizder, qarajatty biýdjetten alyp bere salý - jumystyń basy ǵana», - dedi ministr «Habar» arnasyndaǵy «Ashyq dialog» baǵdarlamasynda.
Onyń aitýynsha, qazir Úkimette, Qarjy, Ulttyq ekonomika, Eńbek ministrlikterinde, ákimdikterde, Azamattarǵa arnalǵan úkimette kóptegen qyzmetkerler kómekti bólý mehanizmin retteý úshin jumys istep jatyr.
«Osynyń barlyǵyn eseptep, talaptaryn belgileý qajet, barlyq jumysta ashyqtyq bolýy kerek. Bul adamdar kúndiz-túni qashyqtan nemese jumys ornynda qyzmet etip jatyr. Bul úshin olarǵa eshkim rahmet aitpaidy, aqparat quraldary men áleýmettik jelide de olar týraly jazylmaidy. Olardyń barlyǵy biýrokratiialyq mashina bolyp kórinýi múmkin. Biraq, olardyń epidemiiamen kúrestegi úlesi orasan. Árine, qatelikter bolýy múmkin. Biraq, osy aǵattyqtar olardyń búkil eńbegin joqqa shyǵarady», - dedi D. Abaev.
Qazirgi ýaqytta 2,5 mln astam adam 110 mlrd teńge bolatyn áleýmettik tólem alǵan.
«Kún saiyn bul tsifrlar artyp keledi. Osynyń barlyǵyn eseptep, júzege asyrý qajet. Bireýler 42 myń teńgeniń az ekenin aityp júr. Biraq, kómek tek aqsha túrinde kelip jatqan joq qoi. Máselen, 1 mln 200 myńnan astam adam azyq-túlik jáne turmystyq jiyntyqtar túrinde kómek alǵan. 1 mln astam adamnyń nesie tóleý merzimi ýaqytsha toqtatyldy. Onyń ishinde 10 myń kásipker bar. Qazirgi ýaqytta 16,5 myń meditsina mamany ústemeaqy aldy. Iaǵni, barlyq baǵyt boiynsha jumys júrip jatyr», - dedi Dáýren Abaev.
