Halyqaralyq valiýta qory (HVQ) Túrkimenstannyń memleket organdary taratqan resmi málimetti "Halyqaralyq ekonomikanyń ósýin boljaý" týraly 2020 jylǵy esebine paidalanýdan bas tartty. Bul týraly Azattyqtyń Túrkimen qyzmeti habarlady.
HVQ esebinde Túrkimenstannyń jalpy ishki ónimi 0,8 paiyz dep kórsetilgen. Al túrkimen úkimetiniń deregi boiynsha, bul kórsetkish 5,9 paiyzǵa jetken.
Glazgo ýniversitetiniń oqytýshysy, Ortalyq Aziia máseleleri jónindegi sarapshy Lýka Ancheski Túrkimenstan ekonomikasy týraly esepte kórsetilgen málimet eldegi ekonomikalyq ahýaldy dálirek kórsetedi dep aitqan.
Onyń aitýynsha, buǵan deiin Halyqaralyq valiýta qory, Aziia damý banki, Dúniejúzilik bank siiaqty halyqaralyq uiymdar óz esepterinde túrkimen úkimetiniń derekterine súienip, Túrkimenstandaǵy shynaiy ahýaldy kórsetpeitin derekterdi jariialap kelgen.
Azattyqtyń Túrkimen qyzmeti jáne ózge de táýelsiz basylymdar sońǵy birneshe jylda Túrkimenstan ekonomikasynyń quldyraǵanyn, azyq-túlik daǵdarysy, qymbatshylyq, bankomattardaǵy aqsha tapshylyǵy máselesi týraly jii jazyp keledi.
Prezident Gýrbangýly Berdiuhamedov 11 naýryz kúngi otyrysta halyqaralyq ekonomikanyń turaqsyz ahýalyna qaramastan Túrkimenstannyń makroekonomikalyq kórsetkishteri "turaqty kúide" qaldy dep málimdegen.
