Halyqaralyq sarapshylar Qazaqstannyń burynǵy ýaqyt beldeýine oralǵany durys ekenin aitty

Sýret: ashyq derekkóz

Halyqaralyq alians sarapshylary Qazaqstannyń burynǵy ýaqyt beldeýine oralý týraly sheshimin qoldady, dep habarlaidy "Ult aqparat".

"Ýaqytty qaitarý" petitsiiasyn qaraý jónindegi jumys toby músheleriniń biri Halyqaralyq tabiǵi ýaqyt aliansy (IANT) hronobiologiia doktory, filosofiia ǵylymdarynyń doktory, Miýnhen ýniversitetiniń aǵa ǵylymi qyzmetkeri, Eýropalyq biologiialyq yrǵaqtar qoǵamynyń, Hronobiologiia qoǵamdarynyń búkilálemdik federatsiiasynyń jáne Eýropalyq uiqy zertteý qoǵamynyń múshesi Till Roionnberg, filosofiia ǵylymdarynyń doktory, Lissabon ýniversitetiniń profilaktikalyq meditsina professory Keit Reis, filosofiia ǵylymdarynyń doktory, Vashington ýniversitetiniń zerthana direktory Erik Hertsog qol qoiǵan úndeýdi usyndy.

IANT úndeýin jumys tobynyń múshesi Bolat Nurǵojaev petitsiia talqylaýy kezinde oqydy.

"Alians dúniejúzilik úilestirilgen ýaqyt (UTC) júiesin qoldanýdy qoldaidy. Bul júie 24 geografiialyq ýaqyt beldeýinen turady, munda 12:00 ár ýaqyt beldeýiniń meridianynda taltúspen sáikes keledi. Bul adamnyń bioritmderin tabiǵi kún ritmderimen sinhrondaýǵa múmkindik beredi, bul kóptegen zertteýler kórsetkendei, densaýlyq úshin oń nátijelerge ie. IANT Qazaqstan úkimetiniń shyǵys oblystaryn UTC+5 beldeýlik ýaqytyna qaitarý týraly sheshimin qoldaidy. Bul – 12:00-de kún ortasy keletin ýaqyt beldeýi. UTC+5 Qazaqstannyń iri shyǵys oblystarynyń boilyqtaryna sáikes keledi jáne halyq úshin eń densaýlyqqa qolaily tańdaý. Qazaqstannyń mysaly basqa elder úshin úlgi bola alady," – delingen úndeý mátininde.

Sarapshylardyń aitýynsha, tabiǵi standartty ýaqytty qoldaný azamattardyń fizikalyq jáne psihikalyq densaýlyǵyn jaqsartýǵa, uiqy sapasyn arttyrýǵa jáne jumys qabiletin joǵarylatýǵa oń áser etedi.

Eske sala ketsek, 1 naýryzda Qazaqstannyń barlyq aimaǵy bir ýaqyt beldeýine aýysqan bolatyn. Alaida biryńǵai ýaqyt beldeýine kóshkennen keiin qazaqstandyqtardyń jaryqqa shyǵyndary arta tústi. Naýryz aiynda el turǵyndary aqpan aiymen salystyrǵanda elektr energiiasyn 364 mln kVt/saǵat artyq paidalanǵan.

Buǵan deiin biryńǵai ýaqyt beldeýine qarsy petitsiia 50 myń qol jinaǵany týraly habarlanǵan edi.