Halyqaralyq olimpiada jeńimpazdaryna joǵary oqý oryndaryna túsý úshin basym quqyq berilýi kerek. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
Senat qabyrǵasynda «Pedagog mártbesi týraly» zań jobasyn talqylaý barysynda depýtat Sergei Ershov ministrden «Altyn belgi» ielerine joǵary oqý ornyna túsý kezinde basymdyq berý qajet pe?» dep suraǵan edi.
«Biz munyń qajeti joq dep esepteimiz. Qazir «Altyn belgi» sany tipti geometriialyq progoresspen artyp jatyr. Búginde «Altyn belgi» ieleri burynǵydai belgilerin UBT arqyly rastamaidy nemese keńes zamanyndaǵydai oblystyq bilim basqarmasynyń komissiiasy teksermeidi. Mekteptiń ózi bul belgini bere salady. Sondyqtan bul belgini berý jáne qorytyndy jumystardy tekserý quziretin oblystyq basqarma deńgeiine berýdi usynamyz», - dedi ministr.
Degenmen, ol halyqaralyq olimpiada jeńimpazdary úshin basym quqyq berý máselesin qaita kóterý qajet dep sanaitynyn aitty.
«Sebebi qazirgi ýaqytta halyqaralyq olimpiada jeńimpazdary basym quqyqsyz qaldy. Olar kóp te emes, jylyna 20-30 adam ǵana. Qazirgi ýaqytta osy halyqaralyq olimpiada jeńimpazdaryn basqa elder alyp ketip jatyr. Sondyqtan halyqaralyq olimpiada, ǵylymi konkýrs jeńimpazdaryna, halyqaralyq sporttyq jarystarǵa qatysýshylarǵa osyndai basym quqyq berý óte mańyzdy», - dedi A.Aimaǵambetov.
