Parlament Májilisiniń jalpy otyrysynda «Qazaqstan Respýblikasy men Halyqaralyq qarjy korporatsiiasy arasyndaǵy Qazaqstan Respýblikasynda ofister qurý jáne olardyń qyzmeti týraly kelisimdi ratifikatsiialaý týraly» zań jobasy maquldandy, dep habarlaidy "Ult aqparat".
Kelisim 2020 jyly 28 qańtarda Nur-Sultan qalasynda jasaldy.
«Kelisim Halyqaralyq qarjy korporatsiiasynyń ofisi qyzmetiniń negizgi erejelerin, sondai-aq, qyzmetkerler úshin artyqshylyqtar men immýnitetterdi belgileidi. Halyqaralyq qarjy korporatsiiasy 1956 jyly qurylyp, halyqaralyq damý institýty bolyp tabylady. Onyń negizgi qyzmeti jeke sektordyń damýyna járdemdesýge baǵyttalǵan.
Halyqaralyq Qarjy Korporatsiiasy Dúniejúzilik bank tobynyń quramyna kiredi», - dedi QR Ulttyq ekonomika ministri Rýslan Dálenov.
Dúniejúzilik bank toby mynadai bes uiymnan turady:
Halyqaralyq qaita qurý jáne damý banki;
Halyqaralyq qarjy korporatsiiasy;
Halyqaralyq damý qaýymdastyǵy;
Investitsiialar kepildikteri jónindegi kópjaqty agenttik;
Investitsiialyq daýlardy retteý jónindegi halyqaralyq ortalyq.
Sonymen birge, korporatsiia óńirlik ofisteri álemniń tek 13 qalasynda, onyń ishinde Almatyda ornalasqan.
«Halyqaralyq qarjy korporatsiiasy ofisteri ornalasqan barlyq memlekettermen ofisterdiń qyzmeti týraly uqsas kelisimder jasady.
Halyqaralyq qarjy korporatsiiasy Qazaqstanda óz qyzmetin 1994 jyldan bastap júzege asyrady. Osy kezeńnen bastap 1,6 milliard dollar kóleminde jobalar qarjylandyryldy. Bul Ortalyq Aziia elderine salynǵan investitsiialardyń jalpy kóleminiń 70 protsentin quraidy. Atalǵan kelisim Halyqaralyq qarjy korporatsiiasynyń qazaqstandyq ofisiniń ornyqty jumys isteýine jáne jańa investitsiialar tartýǵa yqpal etedi. Kelisimdi ratifikatsiialaý teris áleýmettik-ekonomikalyq jáne quqyqtyq saldarlarǵa ákep soqtyrmaidy», - dep túsindirdi ministr.
