Kómirtektik beitaraptyq jónindegi jahandyq saiasat 2030 jylǵa qarai munai baǵasynyń barreline $36-ǵa deiin jáne 2050 jylǵa qarai barreline $24-ǵa deiin tómendeýine ákeledi. Bul týraly Halyqaralyq energetika agenttiginiń (HEA) World Energy Outlook 2021 baiandamasynda jazylǵan, dep habarlaidy QazAqparat TASS agenttigine silteme jasap.
Alaida, boljamnyń basqa stsenariileri boiynsha, munai baǵasynyń dinamikasy basqasha bolady. HEA óz baiandamasynda álemdik energetikany damytýdyń úsh negizgi stsenariiine súiengen, olardyń árqaisysy klimattyq reformalardyń aýqymymen erekshelenedi. Munai baǵasynyń barreline 24 AQSh dollaryna deiin tómendeýi Net Zero Emissions (NZE) stsenariii kezinde bolýy múmkin. HEA mundai strategiiany júzege asyrý kezinde álemge jańa munai men gaz ken oryndary qajet bolmaitynyn túsindiredi.
Alaida, baiandamadaǵy taǵy eki stsenarii aǵymdaǵy baǵa dáliziniń 2050 jylǵa deiin saqtalýyn nemese tipti olardyń ósýin boljaidy. Osylaisha, álemde kómirteksizdendirý boiynsha barlyq maqsattarǵa qol jetkiziletin Announced Pledges Scenario (APS) stsenariiinde munaidyń ortasha baǵasy 2030 jylǵa qarai barreline 67 AQSh dollaryn, al 2050 jylǵa qarai barreline 64 AQSh dollaryn quraidy. Stated Policies Scenario (STEPS) birqalypty boljamy boiynsha, úkimetter konservativti strategiialardy ustanatyn bolady jáne 2050 jylǵa qarai barlyq qoiylǵan klimattyq maqsattarǵa qol jetkizilmeidi, munai baǵasy barreline 60-90 AQSh dollary dálizinde ózgerip otyrady.
Ekonomikany kómirteksizdendirýdiń eń qatań stsenariilerinde Resei men OPEK elderiniń álemdik munai óndirýdegi úlesi qazirgi 40% -ben salystyrǵanda kem degende 60% quraidy, delingen atalǵan qujatta.
