Halyqaralyq dziýdo federatsiiasy jarys kezinde qatań saqtalatyn talaptar tizimin jariia etti, dep habarlaidy "Ult aqparat" Ulttyq Olimpiadalyq komitetiniń baspasóz qyzmetine silteme jasap.
«Álemde keńinen taralǵan indetke qarsy vaktsina áli tabylmaǵandyqtan, týrnir barysynda barlyq saqtyq sharalary qoldanylady. Jarysqa qatysýshylardyń barlyǵy da erejeden attamaýy tiis. Týrnir aldynda sportshylar, resmi tulǵalar, bapkerler men basqa da qatysýshylarǵa testileýden ótý mindetteledi. IJF málimetinshe, týrnirge qatysýshylardyń barlyǵy sońǵy 14 kúnde qandai da bir aýrý belgileriniń joq ekendigin dáledeitin, COVID-19 teris nátijesin kórsetetin meditsinalyq anyqtama ákelýi tiis», delingen Ulttyq Olimpiadalyq komitettiń baspasóz habarlamasynda.
Sondai-aq, jarys ótetin memleketke kelerde sportshylar airyqsha baqylaýda bolady. Turǵyn úige, qonaqúilerge kirerde jáne jarys ótetin aýmaqtyń barlyǵynda dene qyzýy sát saiyn ólshenip turady. Maska kiiý tatami men jattyǵý zaldarynan basqa jerlerdiń barlyǵynda mindetteledi.
