Qazaqstanda KVI-ge qarsy úsh vaktsina qoljetimdi bolady. Bul týraly halyq aldynda esep berý kezdesýinde QR Densaýlyq saqtaý ministri Aleksei Tsoi málim etti, dep habarlaidy "Ult aqparat".
«Qazirgi ýaqytta elimizde shekteý joq, vaktsinany Qazaqstannyń kez kelgen qalasynda ektirýge bolady. Osy oraida jaqynda ornalasqan emhanaǵa nemese ekpe júrgizilip jatqan saýda ortalyǵyna barýǵa múmkindik jasaldy. Vaktsina aqysyz túrde júrgizilip jatyr», - dep toqtaldy ministr Ortalyq kommýnikatsiialar qyzmetinde.
Osy oraida ol elimizde «Spýtnik V» jáne otandyq QazVac vaktsinasyn egý júrgizilip jatqanyn eske saldy.
«Búgin qosymsha arab vaktsinasyn alamyz. Iaǵni, bul ekpe «Sinofarm» kompaniiasynyń qytailyq tehnologiiasymen óndirilgen. Qazirgi kezde osy vaktsinany kútip otyrmyz. "Samuryq-Qazyna" qorynan bólek, vaktsinanyń 750 myń dozasy el halqyna baǵyttalady. Osy arqyly bizde halyq úshin úsh vaktsina qoljetimdi bolady», - dedi Tsoi.
Osylaisha, ministrdiń aitýynsha, qazaqstandyqtar reseilik "Spýtnik V", otandyq QazVac jáne qytailyq Sinopharm vaktsinalarynyń bireýin tańdai alady.
Buǵan deiin "Samuryq-Qazyna" qory qytailyq "Sinopharm" kompaniiasy "Vero Cell" ataýymen jasaǵan vaktsinanyń bir million dozasyn satyp alǵany habarlanǵan edi.
