Jalpyulttyq halyq sanaǵyna 30 myńǵa tarta interviýer jumyldyrylady. Bul týraly memlekettik statistika taqyrybyna arnalǵan dóńgelek ústel otyrysynda QR UEM Statistika komitetiniń tóraǵasy Nurbolat Aidapkelov málim etti, dep habarlaidy QazAqparat tilshisi.
«Halyq sanaǵy aiasynda 30 myńǵa tarta interviýerdi jaldaityn bolamyz. Osy oraida Eńbek ministrligimen birge tiisti buiryq bar, onda jumys isteitin adamdardyń eńbegin tóleý máseleleri eskerilgen. Jalaqy biýdjette qamtylǵan jáne osy adamdardy jaldaý sharalaryn óńirlik organdarmen júrgizemiz», - dedi N. Aidapkelov.
Sonymen qatar ol halyq sanaǵyn júrgizýge tartylatyn adamdarǵa tiisti talaptar qoiylatynyn atap ótti.
«Eger adam qoiylǵan talaptarǵa sai kelse, ony jumysqa alyp, oqytamyz. Osy mamandarmen birge bizdiń qyzmetkerler de bolady, iaǵni málimetterge qatysty qajetti salystyryp tekserý jumystaryn júrgizedi. Jaldanatyn adamdardyń eńbekaqysy túrli sanatqa qarai ózgerip turady, 60 myńnan 85 myń teńge aralyǵynda bolady», - dedi Nurbolat Aidapkelov.
Sonymen qatar, komitet tóraǵasy halyq sanaǵyna qansha qarjy jumsalatynyn da aityp berdi.
Onyń atap ótýinshe, sanaqty júrgizýdiń elektrondy tásili eleýli qarjy somasyn únemdeýge múmkindik beredi. Belgili bolǵandai, halyq sanaǵyn júrgizýge shamamen 9 mlrd teńge jumsalýy yqtimal.
«Málimetterdi qaǵazǵa túsirýden tolyqtai bas tartamyz, iaǵni barlyǵy planshettermen júrgiziledi. Oǵan qosa, balamaly tásilmen turǵyndarǵa sanaqqa ózderiniń qatysýyna y oraida mamandandyrylǵan sait ázirlendi. Adamdar saitqa kirip, óziniń málimetterin engize alady. Alaida interviýer árbir adamǵa barady. Bul turǵyda azamattarǵa sanaqtan ótkendigi týraly SMS jiberiledi», - dedi N. Aidapkelov.
Aita keteik, jalpyulttyq halyq sanaǵy elimizde 2020 jyly ótkiziledi.
