Ulttyq statistika biýrosy Almaty qalasy boiynsha departamentiniń basshysy Aidar Ábildabekov halyq sanaǵy kezinde alaiaqtardan qalai qorǵanýǵa bolatynyn aitty, dep habarlaidy QazAqparat.
Departament basshysy sanaq kezinde almatylyqtarǵa interviýerlerdiń kiimine nazar aýdarýǵa keńes berdi.
«Alaiaqtardan qalai qorǵanýǵa bolady? Aita keteiin, interviýerler 1-30 qazan aralyǵynda úilerdi aralaidy. Olarda Almaty statistika departamentiniń fotosýreti men móri bar kýáligi, sharf, sondai-aq ulttyq sanaq simvolikasy bar sómke jáne derekterdi engizýge arnalǵan elektrondyq planshet bolady. Qujattyń durystyǵyn sanaq.gov.kz saitynda tekserýge bolady. Ol úshin kýáliktiń nómirin «interviýerdi izdeý» arnaiy izdeý jolyna engizý jáne aqparattyń shyndyqqa sáikestigin tekserý qajet», - dedi ol.
Sonymen qatar, spiker saýalnamadaǵy suraqtarǵa toqtaldy.
«Qazaqstandyqtardyń jaýaptary zerdelenedi, olar boiynsha respondentterdiń jalpy jaǵdaiy týraly bilýge bolady. Alynǵan málimetter tekserilip, óńdeledi. 2022-2023 jyldary on jinaqta jariialanatyn qorytyndy shyǵarý josparlanǵan jáne ol kelesi kórsetkishterdi qamtidy: ulttyq quram, kóshi-qon, bilim, neke jáne otbasy, úi sharýashylyǵy, jumyspen qamtý, tabys jáne ómir súrý qarajatynyń kózderi, turǵyn úi sipattamalary», - dedi Aidar Ábildabekov.
