Sońǵy ýaqytta elimizde halyq pen memlekettik organdar arasyndaǵy ózara bailanys artyp keledi. Osyǵan qatysty bilik pen halyq arasynda qarym-qatynas ornatýda áleýmettik jelilerdiń mańyzdylyǵy týraly saiasi keńesshi Dina Aikenova óz pikirimen bólisti, dep habarlaidy QazAqparat.
«2020 jyldy qorytyndylai kele erekshe aityp ótetin jait, halyq pen memlekettik organdar arasyndaǵy ózara keri bailanystyń artýy. Ony Twitter-degi túrli baǵyttaǵy habarlamalar arqyly baiqaýǵa bolady. Bul degenimiz - halyqpen keri bailanystyń arqasynda memlekettik organdardyń qoljetimdi bolýy», - dedi D. Aikenova.
Onyń aitýynsha, búginde memlekettik organdar áleýmettik jelilerdi belsendi qoldanyp keledi.
«Taǵy bir aityp ótetin jait, memlekettik organdardyń áleýmettik jelilerge kóshýi. Bul úrdis alda áli keńinen etek jaiatyn bolady. Mysaly, AQSh prezidenti Djo Baiden arqyly áleýmettik jeli mańyzdylyǵyn ańǵara alamyz. Iaǵni, áleýmettik jeli arqyly qoljetimdiliktiń negizinde saiasi partiialardyń nemese memlekettik apparattyń qyzmetine degen halyq senimi arta túsedi», - deidi ol.
Sondai-aq, saiasi keńesshi qorshaǵan ortany qorǵaýǵa jastardyń erekshe nazar aýdaratynyn aityp ótti.
«Sońǵy ýaqytta el arasynda qorshaǵan ortaǵa jáne janýarlarǵa degen adami qatynas máselesi jii talqylanyp keledi. Bul ne úshin mańyzdy? Álemde jastar saiasi oqiǵalarǵa asa belsendi aralaspaidy degen qaǵida qalyptassa, esesine ekologiia máselesine kelgende olar óte belsendi. Sonymen qatar, qazirgi kezde azamattardyń otbasylyq qundylyqtarǵa mán berýi artyp keledi», - dedi jas saiasattanýshy.
Aita ketsek, búgin elordadaǵy Eýraziialyq integratsiia institýtynda «Turaqsyz álemdegi turaqty memleket»: Q.K. Toqaevtyń 2020 jylǵy basty jeti isi» atty baǵdarlamany talqylaýǵa arnalǵan is-shara ótti. Oǵan saiasattanýshylar, qoǵam qairatkerleri men ǵalymdar qatysty.
