© Sputnik / Kseniia Voronina
Ádilet ministri Qanat Mýsin Nazarbaevtyń atyn kóshe men ǵimarattan alyp tastaý halyqtyń erkinde ekenin aitty, dep habarlaidy Sputnik Qazaqstan.
Búgin Ortalyq kommýnikatsiialar qyzmetinde ótken brifingte jýrnalister Tuńǵysh Prezident Nursultan Nazarbaev atyndaǵy kósheler men ǵimarattardyń ataýyn aýystyrý týraly surady. Ministrdiń aitýynsha, bárin halyqtyń ózi sheshedi.
"Barlyǵy qazaqstandyqtardyń ózine, sol qalada turatyn adamdardyń erkine bailanysty. Sebebi kóshelerdiń ataýyna qatysty sheshimdi jergilikti bilik organdary qabyldaidy", - dedi Mýsin.
Qazirgi tártipke sáikes, qaladaǵy kóshe nemese ǵimarat ataýyn aýystyrý úshin aldymen qoǵamdyq tyńdaýlar uiymdastyrylady. Sol jerde halyqtyń pikiri eskeriledi. Odan keiin máslihat pen onomastikalyq komissiianyń qaraýyna shyǵarylady.
Ministr Mýsin Tuńǵysh Prezidenttiń atyn Ánuran avtorlyǵynan alyp tastaýǵa qatysty suraqqa da jaýap berdi.
"Qazir "Memlekettik rámizder týraly" zańdy ózgertý máselesi qaralyp jatqan joq. Al endi Tuńǵysh Prezident Ánuran avtorlarynyń biri bolsa, ony eshkim alyp tastai almaidy", - dep túiindedi ol.
