Foto: kznews.kz
Atyraýda qurylysy áli kúnge deiin aiaqsyz qalǵan 25 sport alańynyń búgingi jaǵdaiyna Jańa adamdar alańdaýshylyq bildirip, ákimshilikpen bailanysty, dep habarlaidy "Ult aqparat".
Aqparat kózderine súiensek, bul nysandardyń jalpy qurylysyna 1,2 milliard teńge qarjy bólingen. Alaida 5 jyl boiy qurylysy aiaqtalmai, sol kúii tur. 2023 jyldyń kókteminde Jańa Adamdar osy máseleni kótergen tusta Atyraý qalasy ákiminiń orynbasary Nurjan Ermuhanov búkil Qazaqstanǵa kamera aldynda 2023 jyldyń aiaǵy nemese 2024 jyldyń basyna qarai balalar sport alańdaryn tolyqtai paidalana alatynyn aityp, ýáde etken edi.
«Halyq qahary» azamattyq naýqanynyń belsendileri osy ýádeniń oryndalǵanyna kóz jetkizý maqsatynda qaita baqylaý júrgizip, nátijesinde qurylys “baiaǵy jartas sol jartas” kúide turǵanyn anyqtady.
Ermuhanovtyń sózinde turmai, qur ýádemen aldap-arbaǵany, árine, qynjyltady. “Qulaqqa kespe ilgen” sheneýniktiń sóziniń de, óziniń de qadiri qalmaǵanyna kóz jetti. Jańa Ádiletti Qazaqstanda bilik tarapynan adamdarǵa mundai qarym-qatynas kórsetýge jol berilmeidi.
Ashynǵan «Halyq Qahary» azamattyq naýqanynyń belsendileri Nurjan Ermuhanovtyń bos ýádesi men essiz áreketin halyq baǵalaý kerek dep sanaidy. Sol úshin Atyraý kóshelerine shyǵyp, halyqqa da Úndeý jasady. Atyraýlyqtar da óz oilaryn ashyq bildirýden qymsynǵan joq.
Osylai Nurjan Ermuhanovqa “aýyrdyń ústimen, jeńildiń astymen” júretin, mindetin durys atqarmaityn sheneýnikterge beriletin «Halyq Qahary» anti-júldesi, LRT tiregi beinesindegi músinshe tabystaldy. Biraq ákim basyn ala qashyp, eshqandai ýáde bermegenin alǵa tartty. Tipti barlyǵy aidan anyq kórsetilgen beinejazbany da joqqa shyǵardy. Al “teris marapatty” aiqai-shýmen belsendiler kabinetke qaldyrdy.
«Halyq Qahary» azamattyq naýqanynyń kóshbasshysy Alihan Sarsenov:
«Men sheneýnikterge, basshylarǵa, direktorlarǵa, basqarýshylarǵa jáne halyq aldynda jaýapty barlyq adamdarǵa aitamyn! Qarapaiym bir nárseni este saqtańyzdar. Eger máseleniń sheshilýine uzaq ýaqyt qajet bolsa, adamdar ony umytyp ketedi dep úmittenbeńizder. Kerisinshe, qalalyqtar ádildik ornatyp, ózderin aldap júrgendermen kezdesýdi talap etetin bolady. Bizdiń jobanyń mindeti – osy kezdesýdi uiymdastyrý. Biz muny mindetti túrde oryndaimyz. Bul jaǵymsyz, uiat kezdesýden aýlaq bolýdyń bir ǵana joly bar. Halyq igiligi úshin óz jumystaryńyzdy tiimdi jáne adal atqaryńyzdar. Jańa Ádiletti Qazaqstanǵa laiyq áreket etińizder», — deidi.
