Keshe Memleket Basshysynyń jarlyǵymen senat depýtaty bolyp taǵaiyndalǵan tanymal telejúrgizýshi Dana Nurjigit jyly lebiz bildirgeni úshin qyzaqstandyqtarǵa alǵys aitty.
"Qadirli oqyrmandarym, qymbatty otandastar! Maǵan joldaǵan quttyqtaýlaryńyzdy oqyp otyrmyn. Kóp raqmet! Prezident jarlyǵymen maǵan júktelgen mindettiń mártebesi qanshalyqty biik bolsa, salmaǵy atan túiege júk bolarlyq sonshalyqty aýyr ekenin jiti túsinip otyrmyn Halyq amanatyn kóterip, kóptiń úmitin aqtaý endi bizdiń býynǵa júktelip otyr", - dep jazdy ol instagram-daǵy paraqshasynda.
Dana Nurjigit qal-qaýqarynsha adal eńbek etip, el ómirinen ajyramai, kabinet qyzmetkeri emes, halyq qyzmetshisi bolýǵa umtylatynyn atap ótti. "Aryq sóilep, semiz shyqqysy" keletinin de jasyrmady.
"Ony aityp otyrǵan sebebim, "Dara jol" habary toqtamaidy", - dep málimdedi senator.
Onyń pikirinshe, habardaǵy kezdesýler, úlgi tutar tulǵalardyń aqyly, tájiribesi, keńesi halyq pen zaman tynysyn, tirshilik tamyrynyń soǵysyn sezinýge aitarlyqtai septigin tigizedi.
"Úlken diirmenge, maidanǵa ketip bara jatyrmyn... Atymdy erttep, batańyzdy berip, aqyl qosqan barshalaryńyzǵa alǵys aitamyn! Alla abyroi bersin deimin",- dep túiindedi Dana Nurjigit.
Esterińizge sala keteiik, 12 tamyzda Qazaqstan prezidenti Qasym-Jomart Toqaev tanymal telejúrgizýshi Dana Nurjigitti senator qyzmetine taǵaiyndady.
1972 jyly 18 shildede Qyzylorda oblysynda dúniege keldi. Qurmanǵazy atyndaǵy Almaty Memlekettik konservatoriiasyn "oqytýshy, kontsertmeister, kameralyq ansambldiń solisi" mamandyǵy boiynsha támamdaǵan.
1994-1996 jyldary Abai atyndaǵy ulttyq ýniversitette, odan Kúlásh Báiseiitova atyndaǵy respýblikalyq kolledjde kontsertmeister bolyp jumys istedi. Al 1997 jyly teledidarǵa keldi. Sodan bastap jańalyqtar qyzmetiniń júrgizýshisi, "Sálem, Qazaqstan!" baǵdarlamasynyń júrgizýshisi, prodiýseri, redaktory, kórkemdik jetekshi qyzmetterin atqardy. "Habar" arnasynda biraz jyl eńbek etti. CaspioNet jobasynyń prodiýseri, "Bilim" arnasynyń redaktory boldy.
Búginde Dana Nurjigit QAZAQSTAN arnasyndaǵy "Dara jol" baǵdarlamasymen keńinen tanymal.
