Halyq ákimge emes, ákim halyqqa degen printsipke kóshemiz. Bul týraly QR Ulttyq ekonomika vitse-ministri Baýyrjan Omarbekov aitty, dep habarlaidy QazAqparat.
«Jalpy ákimderdiń halyqpen kezdesýi 2005 jyly bastalǵan. Iaǵni, sol 2005 jyly Jarlyq qabyldanyp, ákimder jylyna bir ret esep berý kezdesýin ótkizetin. Odan 2013 jyly azdaǵan ózgeris engizildi. Tómen turǵan ákimderdiń esebine oblys nemese qala ákimderiniń qatysýy múmkin degen ózgeris boldy. Biraq, negizgi baǵyty saqtalyp qaldy. Rasynda jylyna bir ret qana esep berý kezdesýi bolyp otyrdy jáne osyǵan deiin sol format tiimdi bolǵan da bolar. Al búgingi tańda qoǵam men bilik arasyndaǵy qarym-qatynasty jetildirý, nyǵaitý maqsatynda bul formattyń tiimdiligi tómen degen paiymǵa keldik. Eskirgen dep aitsaq ta bolady», - dedi vitse-ministr «Habar-24» telearnasyndaǵy «Suhbat» baǵdarlamasynda.
Onyń atap ótýinshe, jyl basynda Prezident ákimderge halyqpen tyǵyz bailanysta bolýdy, turaqty kezdesýdi, eldi mekenderdi jii aralap otyrýdy júktedi.
«Osyǵan orai Memleket basshysy búgin arnaýly Jarlyq qabyldap otyr. Buǵan deiin eseptik kezdesý bolsa, endi turaqty, júieli kezdesýge kóshemiz. Bylaisha aitqanda halyq ákimge emes, ákim halyqqa degen printsipke ótemiz. Nátijesinde barlyq deńgeidegi ákimderdiń turaqty kezdesýleriniń ikemdi kúntizbelik kestesi jasalady. Sol kestege sáikes oblys jáne qala ákimderi jylyna 2 ret, iaǵni jarty jyl saiyn óz aýdandarynda kezdesý ótkizip otyrady. Al odan tómengi aýdan, aýyl ákimderi toqsan saiyn tiisti eldi mekenderde, aýdan ortalyqtarynda, aýyldarda turaqty kezdesý jasaidy», - dedi Baýyrjan Omarbekov.
