Ótken jyly qazaqstandyqtardyń jan basyna shaqqandaǵy ortasha tabysy artyp, 116 myń teńgeden sál astamdy qurady. Bul týraly QR Strategiialyq josparlaý jáne reformalar agenttigi Ulttyq statistika biýrosy habarlaidy, dep jazady QazAqparat.
«2020 jyly halyqtyń orta eseppen jan basyna shaqqandaǵy ataýly aqshalai tabystary aiyna orta eseppen 116 126 teńgeni qurady jáne ataýly mánde 2019 jylmen salystyrǵanda 11,4% ósti.
Osy kezeńdegi tutyný taýarlary men kórsetiletin qyzmetterge baǵalardyń 6,8% ósimi kezinde halyqtyń naqty aqshalai tabystary ótken jylmen salystyrǵanda 4,3% joǵarylady», - delingen habarlamada.
Ulttyq statistika biýrosynyń málimetine sáikes, 2020 jyly halyqtyń orta eseppen jan basyna shaqqandaǵy ataýly aqshalai tabystarynyń eń joǵary mólsheri Atyraý oblysynda baiqaldy. Onda osy kórsetkish ortasha respýblikalyq deńgeiden 2 esege jýyq joǵary boldy.
Tabysy eń tómen óńirler retinde Túrkistan oblysy jáne Shymkent qalasy belgilendi. Bul óńirlerdegi halyqtyń tabys mólsheri ortasha respýblikalyq deńgeidiń 55-65% qurady.
2020 jyly óńirler boiynsha halyqtyń jan basyna shaqqandaǵy tabysynyń eń joǵarǵy jáne eń tómengi shamasy arasyndaǵy aiyrmashylyq 3,4 eseni qurady (2019 jyly – 4 ese).
