M.Áýezov atyndaǵy Qazaq memlekettik akademiialyq drama teatrnda 18 naýryz kúni KSRO jáne Qazaqstannyń halyq artisi, KSRO Memlekettik syilyǵynyń laýreaty, professor Hadisha BÓKEEVANYŃ 100 jyldyǵyna arnalǵan eske alý keshi ótti, - dep habarlaidy "Ult aqparat" teatrdyń baspasóz qyzmetine silteme jasap.
Búginde týǵanyna 100 jyl tolǵan aktrisa ónerine izbasarlary bas ie otyryp, Áýezov teatrynda dástúrli ótkiziletin «Teatr kóktemi» festivalin tańǵajaiyp talant iesine arnaǵan bolatyn. Bul igi bastama kórermen qyzyǵýshylyǵyn arttyra túskeni sózsiz. Sózimizdiń dáleli retinde, kesh ótetin senbiniń sátin asyǵa kútken kórermen kópshilik saǵat tili keshki besti kórsete bere teatr tórine qarai aǵylǵanyn aityp ótsek de jetkilikti. Úlken zaldy lyq toltyrǵan kóp kórermen qatarynda mektep qabyrǵasyndaǵy baldyrǵandar da, samaiyn aq shalǵan qarttar da bolǵany tipten kóńil qýantty. Osydan-aq, baitaq dala tósinde bir shoq gúldei jainaǵan ónerli qyzyn óz halqy qanshalyq saǵyna eske alatynyn ańǵarýǵa bolatyn edi.
Alys-jaqynnan kelgen kórermenderdiń qatarynda QR eńbek sińirgen qairatkeri, "Qurmet" órdeniniń iegeri, madeniet jáne sport ministri Arystanbek Muhamediulynyń qatysýy eske alý keshiniń el mádenietindegi eleýli shara ekenin aiǵaqtai tústi. Ministr jinalǵan kópshilikti kele jatqan naýryz merekesimen quttyqtai otyryp, teatr óneriniń has sheberi Hadisha Bókeevanyń biik ónerine bas ietinin jetkizdi. Ári «Teatr kóktemi-2017» festivaliniń jeńimpazy retinde «Aqtastaǵy Ahiko» qoiylymyn marapattady. Qazaqtyń qadirli qariiasy, KSRO halyq artisi Asanáli Áshimov aǵa býyn salǵan sara jolda ózin kórsetip úlgirgen jas akter, “Serper” jastar syilyǵynyń iegeri Erkebulan Daiyrovqa arnaiy júlde tabystady. Odan ári kesh kórigin sahna sańylaqtary qyzdyrdy. Ádemi án de, áserli kúi de, ásem bi de boldy. Arasynda sahynalyq qoiylymdar kórsetilip, Hadisha Bókeevanyń kezinde somdaǵan sátti rolderi qaita jańǵyrtyldy. Áýezov teatry daiyndaǵan H.Bókeevanyń shyǵarmashylyq ómirinen syr shertetin qysqametrajdy derekti film kórsetildi.
Hadisha Bókeeva «Abai» spektaklindegi Bastaýshy roli úshin KSRO Memlekettik syilyǵyn alǵan, sondai-aq, qazaq ádebieti men óneriniń Máskeýde ótken onkúndikterinde M.Áýezovtiń «Abai» romanynan, Jambyl jyrlarynan, 1977 jyly Leningradta ótken kúnderde J.Moldaǵalievtiń «Men – qazaqpyn!» poemasynan úzindiler oqyp, ulttyq ónerimizdiń mártebesin álem kókjiegine kótergen ónerpaz. M.Áýezov teatrynda 60 jyldan astam ýaqyt qyzmet etken uly aktrisaǵa qurmet retinde biyl 24 aqpan kúni Batys Qazaqstan oblystyq drama teatryna Hadisha BÓKEEVANYŃ esimi berildi. Bul qýanyshty jańalyqty jinalǵan jurtqa dańqty aktrisanyń týǵan jeri asaý Aqjaiyqtyń aq sálemin alyp kelgen BQO mádeniet, arhivter jáne qujattama basqarmasynyń basshysy D.A.Qusaiynov myrza jetkizdi. Bul da bolsa elin súigen esil qyzdy eliniń syilaǵany, esinen shyǵarmaǵanynyń bir belgisi ekeni sózsiz.
Qazaq teatr óneri aspanynda tym biikten kóz tartyp turatyn jaryq juldyz – Hadisha Bókeeva búginde el-jurtynyń maqtanyshyna, súiiktisine ainalǵan. “Taý alystaǵan saiyn biikteidi”-deidi, kózi tirinsinde-aq taý tulǵa ekenin dáleldep qoiǵan aktrisa apamyz arada jyldar ótken saiyn burynǵy biiginen bir sátte alasarmaq emes. Qaita bedeli biiktep, dańqy arta bermek. Bunyń bári de ol kisiniń boiyna tunǵan talanty men dara darynynyń arqasynda týǵan halqynyń júrek túkpirinen tereń oryn alǵanyn kórsetedi. Qazaqtyń sahna ónerin, sahna mádenietin tym biik beleske kótergen keremet aktrisa – Hadisha apamyzdyń halqynan alar marapaty men mahabbaty osymen shektelmeitini sózsiz. Búgin júz jyldyǵyn toilaǵan halqy taǵy júz jyl ótsede ol kisini júrekterden óshirmeidi dep senemiz.
