"Habar" agenttigi 2022 jyly Eurovision baiqaýyn kórsetýden bas tartý sebebin túsindirdi, - dep habarlaidy "Ult aqparat".
"Ózderińiz biletindei, «Habar» agenttigi 2016 jyldan bastap Eýropalyq habar taratý odaǵynyń (EBU) qaýymdastyrylǵan múshesi bolǵaly beri kórermenderine halyqaralyq EUROVISION án baiqaýyn úzbei usynyp keldi. Alaida agenttik biylǵy baiqaýdyń Grand finalynyń kórsetiliminen bas tartýǵa májbúr (2022 jylǵy mamyrdyń 15-ne qaraǵan túni).
Shoý óte tómen reitingter jinaǵandyqtan osyndai sheshimge keldik. Budan bólek Qazaqstannyń óz ánshilerin baiqaýǵa jiberýge quqy joq, al mundai aýqymdy sharaǵa litsenziialyq tólemder tólenýi tiis. Sondai-aq, baiqaýdyń onlain kórsetilim ýaqyty da otandyq telekórermender úshin yńǵaisyz – baiqaý bizdiń ýaqytpen túnde ótedi.
Degenmen aita keterlik jait - «Habar» telearnasynyń kórermenderi maýsym aiynda Vena Filarmoniialyq Orkestri qoiatyn «Summer Night Concert 2022» atty ádemi keshti tamashalaidy. Bul - «Habar» agenttiginiń Eýropalyq habar taratý odaǵynyń (EBU) qaýymdastyrylǵan múshesi bolǵandyqtan týǵan múmkindik.
Sonymen qatar biyl agenttigimiz JUNIOR EUROVISION SONG CONTEST (JESC) qatysatyny anyq. Resmi aqparat JESC Uiymdastyrýshy komissiiasynyń sheshiminen keiin jariialanady. Qatysýshylar jaily aqparatty kútip otyrmyz.
«Habar» agenttigi elimizdiń dara talanttaryna halyqaralyq arenada synǵa túsýge múmkindik týǵyzyp, álemdik aitýly baiqaýlardy ári qarai da kórsete beredi", - delingen agenttiktiń áleýmettik jelidegi habarlamasynda.
