Túrkistan oblysynda biylǵy on aida 492,4 myń sharshy metr baspana paidalanýǵa berildi. Bul týraly búgin oblys ákimi Ómirzaq Shókeev Ortalyq kommýnikatsiialar qyzmeti uiymdastyrǵan onlain-brifingide aitty, dep habarlaidy "Ult aqparat".
Aimaq basshysynyń aitýynsha, Túrkistandaǵy kóppáterli turǵyn úilerdiń qasbetteri tutastai ashyq tústi mármár tas pen travertinmen qaptalýda. Turǵyn úi qurylysy qalanyń ákimshilik-iskerlik ortalyǵynda qarqyn ala túsken. Mundaǵy 7 qabatty 24 turǵyn úi qarasha aiynyń sońynda salynyp bitedi dep josparlanǵan.
«Ipotekalyq turǵyn úilerdiń qatary artyp, jyl sońyna deiin kezekte turǵan 1822 otbasy baspanaly bolady. Basym bóligi turǵyn úige muqtaj tiziminde tirkelgen kópbalaly otbasylarǵa, biýdjettik sala qyzmetkerlerine, múmkindigi shekteýli jandar men jetim balalarǵa beriledi», - dedi Ómirzaq Shókeev.
Aimaqta turǵyn úidi paidalanýǵa tapsyrý jospary 595,7 myń sharshy metrdi quraidy. 10 ai ishinde 406,4 myń sharshy metr úi paidalanýǵa berilgen. 2020 jyly «Nurly jer» baǵdarlamasynyń aiasynda memlekettik biýdjet esebinen 158 nysannyń qurylysyna 36,6 mlrd teńge bólingen. Jyl qorytyndysy boiynsha 70 nysan paidalanýǵa tapsyrylmaq.
«Jalpy, oblys boiynsha biyl 240 biýdjettik investitsiialyq joba iske asyrylýda. Biyl memlekettik jáne ishki ister organdary men bilim berý, densaýlyq saqtaý jáne mádeniet salalaryna tiesili 77 nysannyń qurylysyn aiaqtaý josparlanǵan», - dedi oblys ákimi.
