QR Densaýlyq saqtaý vitse-ministri Ajar Ǵiniiat mektep oqýshylary arasynda koronavirýs juqtyrý jaǵdailaryna qatysty túsinik berdi, dep habarlaidy "Ult aqparat".
Ortalyq kommýnikatsiialar qyzmetindegi baspasóz máslihatynda kezekshi synyptarda oqyp jatqan balalar arasynda koronavirýs juqtyrý jaǵdailary týraly suraq qoiyldy.
«Qazirgi kezde kezekshi synyptar arasynda 36 oqiǵa tirkeldi. Osy balalarmen bailanysta bolǵan 575 oqýshy anyqtaldy, olardyń arasynda da 10 balada analiz oń nátije berdi. Aýrý kóbine balalar arasynda simptomsyz nemese jeńil túrimen ótip jatyr. Bul balalardyń ishinde beseýi statsionarlyq kómekke júgindi. Onyń úsheýiniń jaǵdaiy ortasha dárejede ekeni anyqtaldy», - dedi A. Ǵiniiat.
Onyń sózine qaraǵanda, Shyǵys Qazaqstan oblysynda aýyrǵan balalardyń sany 13-ke jetti, Soltústik Qazaqstan óńirinde 12 jaǵdai, sondai-aq basqa óńirlerde 1-2 baladan tirkeldi.
Sonymen qatar vitse-ministr qashyqtan oqyp jatqan balalarǵa toqtaldy.
«Qashyqtan oqyp júrgen oqýshylar arasynda 73 jaǵdai tirkelip otyr. Bailanysta bolǵan 242 adam anyqtalyp, olardyń ishinde 15 jaǵdai boiynsha analizde oń nátije anyqtaldy. Barlyq balalardyń densaýlyǵyn qatań baqylaýda ustap otyrmyz. Osy oqýshylar arasynda aýyr jaǵdai tirkelmedi», - dedi ol.
