Foto: pixabay.com
Qazaqstanda keiingi 6 jylda 800 bala seksýaldy zorlyq kórgen. Bul týraly "Nemolchi" qoǵamdyq qory ótkizgen is-sharada aityldy, dep habarlaidy Sputnik Qazaqstan.
Qoǵamdyq qor belsendileriniń aitýynsha, tirkelgen árbir bes istiń ekeýi ǵana sotqa jetken. Balasy seksýaldy zorlyq kórgen ata-analar ádilettilikke jete almaidy. Is-sharaǵa jinalǵan ata-analar quqyq qorǵaý organdary óz mindetin durys atqarmaidy deidi.
"2022 jyly tamyzda Býrabai aýdanyndaǵy "Mirotvorets" balalar lagerinde meniń balama eki ret seksýaldy zorlyq jasalǵan. Lager basshylyǵy bul jaǵdaidy maǵan aitpaǵan. Sotqa deiingi tergeý kezinde quqyq qorǵaý organdary tarapynan kóptegen zańbuzýshylyq boldy", - deidi jábirlenýshiniń anasy.
Al Almaty oblysynda 10 jastaǵy baladan jábir kórgen 7 jastaǵy balanyń anasy Aiman da áli kúnge ádilettilikke jete almai júrgenin aitady.
"Sot jábir kórsetken oqýshyny arnaiy mektepke ornalastyrý týraly sheshim shyǵarýdan bas tartty. Sot otyrysy ashyq bola tura bizdi qatystyrmady. Meniń balama seksýaldy zorlyq kórsetken oqýshynyń ata-anasyna 20 AEK kóleminde aiyppul saldy, sonymen is bitti. Zorlyq jasaǵan bala jasy 11-de bolǵandyqtan esh qylmystyq is qozǵalmaidy. Saiyp kelgende bizdiń quqymyzdy quqyq qorǵaý organdary taptap otyr", - deidi jábirlenýshiniń anasy Aiman.
Al balalardyń quqyn qorǵaýshy advokattardyń aitýynsha, quqyq qorǵaýshylar isti tezdetip jabýǵa asyǵady.
"Sýitsid dep quqyq qorǵaý organdary qutyla salǵandy jón kóredi, tezirek isti japqysy keledi. "Óz-ózine qol jumsaýǵa deiin jetkizý" degen bapty jappai qoldana beredi. Balasynyń quqy taptalǵan ata-ana isti aiaǵyna deiin jetkizý kerek", - deidi jábirlenýshilerdiń biriniń advokaty Saida Súleimenova.
Advokattar men ata-analardyń aitýynsha, sot meditsinalyq saraptama da sapasyz, atústi jasalady.
"Memlekettik sot saraptamasynyń sapasy tómen. Al jekemenshik saraptama sheshiminiń Qazaqstanda esh mártebesi joq. Qazaqstandaǵy quqyq qorǵaý organdarynda óz isin bilmeitin politsiia men tergeýshiler jumys isteidi", - deidi eki birdei jábirlenýshiniń advokaty Roza Kim.
"Nemolchi" qory ótkizgen jiynnyń maqsaty – Qazaqstandaǵy bala quqyn taptaityndardyń jolyn kesý, toqtatý. Alaida is-sharaǵa quqyq qorǵaý organdarynan arnaiy shaqyrtylǵan bir de bir jaýapty maman kelmedi. Al jinalǵandar seksýaldy zorlyq-zombylyqqa qatysty zań qatań bolmaiynsha, dabyl qaqqandaryn toqtatpaitynyn aitty.
