Maýsym aiynda ailyq infliatsiia 1,6 paiyzǵa jedeldegen. Ulttyq bank ókili Igor Osipovtyń aitýynsha, keiingi 5 jyldyń maýsym ailarynda mundai infliatsiia bolyp kórmegen, dep habarlaidy QazAqparat.
Ultyq banktiń aqsha-kredit saiasaty departamenti naqty sektor monitoringi basqarmasynyń bastyǵy Igor Osipovtyń aitýynsha, maýsym aiynda eldegi jyldyq infliatsiia 14,5%-ǵa (mamyrda – 14%) jedeldegen.
Aimaqtar arasynda Mańǵystaý (mamyrdaǵy 15,2%-dan maýsymda 17,0%-ǵa deiin) men Aqmola oblystarynda (13,9%-dan 15,3%-ǵa deiin) eń joǵary infliatsiia baiqaldy.
«Maýsym aiynda azyq-túlik baǵasynyń ósý qarqyny 19,2%-ǵa deiin (mamyrda – 19,0%) ulǵaidy. Mundaǵy eń joǵary ósim Mańǵystaý oblysynda (23,6%) boldy. Al azyq-túlikke jatpaityn taýarlar baǵasynyń ósý qarqyny 13,2%-ǵa deiin (mamyrda – 11,9%) artty. Eń joǵary mán Nur-Sultan qalasynda (16,4%), al tómen mán – Shymkent qalasynda (10,8%) tirkeldi. Aqyly qyzmetterdiń baǵasy maýsymda 9,2%-ǵa ósti (mamyrda – 9,1%), bul rette Túrkistan oblysynda jalpy respýblikalyq deńgeiden birshama joǵary (11,4%) boldy, al Atyraý oblysynda aitarlyqtai baiaý (6,0%) ósti. 2022 jyldyń maýsym aiynda eldegi ailyq infliatsiia 1,6% boldy. Bul sońǵy 5 jyl ishinde maýsym ailaryndaǵy infliatsiianyń ortasha máninen aitarlyqtai joǵary (2017-2021 jyldary: 0,5%) kórsetkish. Búkil óńirde 2022 jylǵy maýsymda baǵa ortasha tarihi normasynan joǵary ósti. Ailyq infliatsiianyń aitarlyqtai qarqyny Mańǵystaý oblysynda (2,6%) tirkeldi», - dep jazylǵan Ulttyq banktiń resmi saitynda jariialanǵan túsindirmede.
