Parlament Májilisiniń jalpy otyrysynda palata depýtattary «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaidy QazAqparat.
Ruqsattan aiyrý nemese onyń qoldanylýyn toqtatý, qyzmetti toqtatý nemese tyiym salýdy kózdeitin jekelegen ákimshilik quqyq buzýshylyq isterdi qaraýdy ýákiletti organdardyń quziretine berý eskerilip otyr.
«Konstitýtsiialyq novellalar qoǵam men memleket ómiriniń barlyq salalaryn odan ári jańǵyrtýdyń berik irgetasyn qalady. Konstitýtsiialyq reforma aiasynda atqarýshy memlekettik organdardyń jáne olardyń basshylarynyń jaýapkershiligi artty. Osyǵan bailanysty bul baǵytta júrgizilip jatqan memlekettik saiasat ákimshilik quqyq buzýshylyq týraly zańnamasynda da uqsas reformalardy talap etedi. Osylaisha, zań jobasy tek sotpen ǵana qoldanatyn ákimshilik jazalardy qaita qaraýdy, sondai-aq ýákiletti organdardyń quziretine olarmen óz betinshe qoldanylýy múmkin ákimshilik jazalardy jatqyzýdy usynady», - dep túsindirdi QR Ádilet ministri Marat Beketaev.
Atap aitqanda, ákimshilik quqyq buzýshylyqtardyń jetpisten asa quramdaryn sottardan ýákiletti memlekettik organdardyń quziretine berý usynylady. Bul tulǵalardyń sot organdaryna daýsyz ister boiynsha júginý qajettiligin alyp tastaýmen qatar, memlekettik organdardyń jaýapkershiligin arttyrady.
Sonymen birge, azamattardyń isti sotta qaraýdy tańdaýǵa quqyǵy saqtalatyn bolady. Iaǵni, bul ister boiynsha sot baqylaýy jalǵasady.
Munymen qosa, ákimshilik quqyq buzýshylyq týraly isterdi júrgizýdi elektrondyq formatqa aýystyrý qarastyrylǵan.
«Azamattar úshin ákimshilik quqyq buzýshylyq týraly isti qozǵaý jáne ony qaraý tártibi qarapaiym ári túsinikti, al aiyppuldardy tóleý júiesi memlekettik organdarǵa neǵurlym az barýmen qosa, múmkindiginshe yńǵaily bolǵan mańyzdy. Osyǵan bailanysty Bas prokýratýranyń bastamasy boiynsha zań jobasynda Ákimshilik rásimderdiń biryńǵai tizilim júiesin engizý bóliginde túzetýler qarastyrylǵan. Bul memlekettik organdardyń jáne ekinshi deńgeidegi bankterdiń aqparattyq júielerimen integratsiialanatyn ákimshilik protsesi bar elektrondyq isti qalyptastyrýǵa múmkindik beredi», - dedi vedomstvo basshysy.
Aita keteiik, atalǵan zań jobasy aiasynda ákimshilik quqyq buzýshylyq aiyppuldary mólsheri tómendeitin bolady.
«Ákimshilik quqyq buzýshylyq sanktsiialaryna júrgizgen taldaý olardy ákimshilik jaýapkershilikti odan ári izgilendirý aiasynda jeńildetýge jáne tómendetýge múmkindik bar ekenin kórsetti. Memlekettik organdardyń jáne úkimettik emes uiymdardyń usynystary negizinde, sondai-aq taldaý men statistikalyq derekterdi eskere otyryp, zań jobasymen qyryq tórt quram boiynsha aiyppul mólsherin azaitý, on quram boiynsha ásire qatańdyqty tómendetý, alty quram boiynsha eskertý engizý usynylady», - dep atap ótti Marat Beketaev.
