Semeide 52 jastaǵy áielin beisbol bitasymen uryp óltirdi degen kúdikpen onyń kúieýi qamaýǵa alyndy. Marqumnyń týystarynyń aitýynsha, er adam áieline ondaǵan soqqy jasap, keiin oqiǵa ornynan qashyp ketken, dep habarlaidy ult.kz.31-arnanyń «Informbiýro» baǵdarlamasyna málimetinshe, marqum Aijan Baiahmetovanyń týystary onyń kúieýinen uzaq jyldar boiy qysym kórgenin aitady. Olardyń sózinshe, er adam ishimdik iship alyp, jii janjal shyǵaratyn bolǵan.
«Bitamen basynan urǵan. Qabyrǵasyn, saýsaqtaryn syndyrǵan. Qolyna, jambasyna soqqy jasaǵan. Arqasy kógerip ketken. Barlyǵy 27-28 ret soqqy bolǵan», – deidi marqumnyń týysy Janna Nurǵazina.
Otbasynyń aitýynsha, erli-zaiypty sáýir aiynda eki jaqqa tynysh túrde ketýge kelisken. Alaida araǵa birneshe kún salyp, er adam úige kelip janjal shyǵarǵan. Týystarynyń málimetinshe, ol áieliniń jáne balalarynyń kiimderi men qujattaryn órtep jibergen.
Marqumnyń jaqyndary er adamnyń áielin biraz ýaqyt boiy ańdyp júrgenin aityp otyr.
«Sottyń ádil ótýin talap etemiz. Bul isti bir ǵana bappen shektemei, barlyq jaǵdaidy eskerý kerek. Ol apaiymdy ańdyǵan, qysym kórsetken. Sońyna deiin artynan júrip, osyndai jaǵdaiǵa jetkizdi. Eń aýyr jaza taǵaiyndalýyn suraimyz», – dedi týysy.
Kúdikti qylmys ornynan qashyp ketkenimen, kóp uzamai ustalyp, qamaýǵa alynǵan.
Bul jaǵdai marqumnyń eki balasyna aýyr soqqy bolǵan. Týystarynyń aitýynsha, 12 jastaǵy qyzy anasynan aiyrylǵannan keiin tutyǵyp sóilei bastaǵan. Al 16 jastaǵy ulynyń jeńil dárejeli aqyl-oi kemistigi bar ekeni aityldy.
Atalǵan fakti boiynsha «Adam óltirý» baby boiynsha qylmystyq is qozǵalǵan. Tergeý aiaqtalyp, is sot qaraýyna jiberilgen.
