Shymkentte liftide azǵynnyń qolynan aman qalǵan áiel kúdiktini keshirmeitinin aitty, - dep habarlaidy Tengrinews.kz agenttigi Otyrar.kz saityna silteme jasap.
"Únemi qatty qorqyp júretin boldym. Qatty ýaiymdaimyn. Ol jazalanýyn qalaimyn", - deidi Nadejda esimdi jábirlenýshi.
Telearna málimetinshe, "Qursaǵymda balam baryn aitsam da, tunshyqtyryp, áreketin toqtatpady" degen ol kúdikti zorlyq jasaǵysy kelgenine senimdi. Biraq ol quzyrly organ júrgizip jatqan tergeý jumysyna kúmánmen qaraidy.
"Tergeýshiler saraptamaǵa shaqyramyz degen edi. Biraq odan eshqandai habar joq. Keshirim ber dep týystary habarlasyp jatyr. Biraq men keshire almaimyn, ol meni zorlaýǵa ne óltirýge oqtaldy. Ol tezirek tiisti jazasyn alǵanyn kórgim keledi", - dedi jábirlenýshi.
Al politseiler kúdikti tergeý izoliatorynda ekenin aitady. 22 jastaǵy jigit jaqynda ǵana áskerden kelgen. Ustalǵan soń ol áieldi zorlaityn oiym bolǵan joq depti.
"Kúdikti tulǵa jábirlenýshi aitqan sózben kelispeidi. Ol zorlaý maqsatynda emes, jábirlenýshiniń qolyndaǵy uialy telefondy tartyp almaq maqsatta osyndai áreketke barǵanyn aitty. Dúkennen shyǵyp kele jatqan jábirlenýshini kórgen. Onyń qolynda telefondy kórip, ashyq túrde tartyp almaq bolǵan", - dedi Shymkent qalasy PD Qarataý aýdandyq bólim bastyǵynyń orynbasary Aianhan Omarov.
Eske salaiyq, 25 mamyrda Shymkentte er adam liftide balaly áielge shabýyl jasaǵanyn habarlaǵan edik. Jelide taraǵan videoda kúdikti áieldiń aýzyn jaýyp, arba ishindegi paketti tartyp alatynyn kórýge bolady. Bir qolymen áieldiń aýzyn jaýyp turyp, ekinshi qolymen álgi paketti sómkesine salady. Osy kezde lift esigi ashylyp, sábili áiel qashyp shyǵady.
