Túrkistan oblysy Kentaý qalasynda kásipker Bekbolat Bekenovtiń tikelei demeýshiligimen ottegi stantsiiasy salyndy. Táýligine 250 ottegi ballonyn toltyrýǵa qaýqarly stantsiianyń jalpy quny 60 mln teńgeni quraidy, dep habarlaidy "Ult aqparat".
Qala ákimi Daýren Mahajanov ortalyq aýrýhanaǵa ornalastyrylǵan jańa stantsiianyń jai-kúiimen tanysyp, jomarttyq tanytqan kentaýlyq azamatqa alǵysyn jetkizdi.
«Álemdi jaýlaǵan koronavirýs indeti bizdiń elimizdi de ainalyp ótpedi. Bul jaǵdai halyqqa aitarlyqtai qiyndyqtar alyp kelgeni barshaǵa aian. Mine, osyndai qiyndyqtardy eńserý úshin memleket tarapynan ǵana emes, jekelegen jany jomart azamattardyń demeýshiligimen emhana men aýrýhanalarymyzǵa kóptegen kómekter berilip jatyr. Halyqtyń qamyn oilaǵan osyndai azamattarymyzǵa alǵystan basqa aitarymyz joq», – dedi qala ákimi.
Aita keteiik, qazirgi tańda Kentaý kalalyq aýrýhanasynda «COVID-19» indetin jáne virýsty pnevmoniia aýrýyna shaldyqqan naýqastar joq. Degenmen qaladaǵy infektsiialyq statsionar naýqastardy qabyldaýǵa daiyn tur. Indettiń kelesi tolqynyna daiyndyq maqsatynda jospar túzilip, 580 tósek oryn ashýǵa jumystar júrgizilgen. Sondai-aq, aýrýhanada koronovirýsty infektsiia men virýsty pnevmoniiany emdeýge 2 aiǵa jeterlik dári-dármek qory jinaqtalǵan.
