Foto; okg.kz
«Ár aýdan ózin-ózi qamtamasyz ete alatyndai jaǵdaiǵa jetýi tiis». Kentaý qalasynyń damý josparlaryn tyńdaǵan oblys ákimi Darhan Satybaldy osylai dedi.
Kentaý qalasynyń ákimi Jandos Tasov aýdannyń 2025-2030 jyldarǵa arnalǵan jol kartasynyń negizgi baǵyttary men kórsetkishterin baiandady.
Oblys ákimi shahardy damytý boiynsha naqty tapsyrmalar berdi. Qalanyń áleýeti tolyq paidalanylmai otyrǵanyn aityp, óndiris oryndaryn ashýǵa kúsh salýdy, investitsiia tartýdy, týrizmdi qolǵa alýdy tapsyrdy.
Damý tujyrymdamalaryna qatysty ekonomika, aýyl sharýashylyǵy, kásipkerlik, týrizm salalaryn damytyp, jumyspen qamtý úshin tiisti basqarma basshylarynyń usynystary qaraldy.
– Kentaýdyń damý áleýeti zor. Shaharda jańa kásiporyndardy ashý úshin indýstrialdy aimaq qurylǵan. Aimaq jol, jaryq, aýyz sý jáne káriz júielerimen qamtamasyz etilgen. Biraq, áli de iri jobalar joqtyń qasy. Qalanyń óndiristik áleýetin kóterý – ýaqyt talaby. Shahardyń damýyna tyń serpin beretin jobalar qajet. Ákim ámbebap bolý kerek. El úshin jumys istep jatqan ár qyzmetker ádil, týrashyl, halyqshyl bolýy shart. Tájiribe, bilim, kásibilik talap etiledi. Jetpese, úirenińizder. Kórshi elderge baryp, tájiribe jinańyzdar. Oqýdan, bilim alýdan eshqashan jalyqpaý qajet. Ár aýdan, qala ózin-ózi qamtamasyz ete alatyndai jaǵdaiǵa jetýi tiis. Qazyna qarjysyna táýeldilikti tómendetip, ishki jáne syrtqy investitsiialardy tartýda úzdiksiz jumys isteńizder. Osy baǵytta jumystardy kúsheitýdi tapsyramyn, – dedi oblys ákimi Darhan Satybaldy.
9 aidyń qorytyndysymen Kentaýdyń jalpy óńirlik óniminiń kólemi 61 mlrd. teńgeni qurady. Qala ákiminiń aitýynsha, 2030 jylǵa deiin jergilikti kirister kólemin keminde 1,5 esege deiin arttyrý kózdelip otyr. 2023 jyly qalaǵa 46,7 mlrd. teńge investitsiia tartylǵan bolsa, 2024 jyly onyń kólemin 50 mlrd. teńgege deiin arttyrý josparlanǵan. Biylǵy 9 aida naqty 17,2 mlrd. teńge kóleminde investitsiia tartyldy.
Kentaý qalasynyń aýmaǵynda geologiialyq-barlaý jumystaryn júrgizýge tartymdy, paidaly qazbanyń zerttelmegen jáne paidalanylmaǵan jetkilikti qory shoǵyrlanǵan. Qala aýmaǵynda ornalasqan arnaiy ekonomikalyq aimaǵy men indýstrialdy aimaǵynyń múmkinshilikterin jáne eńbek potentsialyn eskere otyryp, damytýdyń negizgi baǵyty retinde ónerkásip salasynda taý-ken jáne óńdeý ónerkásipterine basymdyq beriledi. Ózge salalar boiynsha da tiisti jumystar atqarylady.
