Túrkistan oblysy, Kentaý qalasynda ortalyq jylý júiesine qosylǵan nysandar kóbeigendikten kópqabatty turǵyn úilerdiń jylý sapasy nasharlaǵan. Bul týraly jylý ortalyǵynyń basshysy Ashat Abdrasilov málimdedi, dep habarlaidy QazAqparat.
Ashat Abdrasilovtyń sózinshe, endi sol nysandardyń eń iri degenderi shetinen jylýdan ajyratylady.
«Kommertsiialyq nysandardyń ielerine aldymen eskertý jiberiledi. Jinalys ótkizip, túsindirme jumystaryn júrgizemiz. Toihanalar men bazarlar ortalyq jylý júiesinen ajyratylady. Sodan keiin bir apta kóleminde jumystardy atqaratyn bolamyz»,– deidi Kentaýdaǵy jylý ortalyǵynyń basshysy.
Qazir ortalyqqa shahardaǵy Rysqulov, Ýálihanov, Ál-Farabi kóshelerindegi kópqabatty úilerdiń turǵyndarynan shaǵym túsken. Sebebi bul úilerdiń jylý júieleri qosymsha nasosty qajet etedi. Endi sol qurylǵyny ornatý jumysy qolǵa alynbaq. Qalǵan kommertsiialyq nysandardy jylý júiesinen ajyratý kelesi jylý maýsymyna deiin júzege asyrylmaq. Óitkeni ortalyqtyń kúshi barlyǵyn qamtýǵa jetkiliksiz. Aita keteiik, jalpy qalada 348 kópqabaty úi, 2500-den asa jeke sektordaǵy úi, 441 kommertsiialyq nysan, 112 biýdjettik mekeme jylý ortalyǵyna qosylǵan. Jalpy abonent sany 11738-di qurap otyr.
