sýret: otyrar.kz
Kentaýda jasóspirim qyzdar tóbelesip, bireýi aýrýhanaǵa tústi.
Bul oqiǵa videoǵa túsip qalǵan. Kadrda bir qyzdyń ekinshisiniń shashynan julyp, basynan urǵylap jatqanyn kórýge bolady. Al videony túsirip turǵandar ajyratýdyń ornyna tóbelestiń kórigin qyzdyryp tur, dep jazady Sputnik agenttigi Otyrar portalyna silteme jasap.
Atalǵan fakt boiynsha 17 jeltoqsanda Kentaý politsiiasyna jábir kórgen qyzdyń anasy shaǵymdandy. Onyń aitýynsha, qyzy kóptegen dene jaraqatyn alǵan.
Málim bolǵandai, joǵary synypta oqityn eki qyz sózge kelispei qalǵan. Arty janjalǵa ulasyp, olar mektep aýlasynda jaǵa jyrtysqan.
Oqiǵadan keiin bir qyz aýrýhanaǵa jetkizildi.
Politsiia eki jasóspirimniń ata-anasymen jáne mektep ákimshiligimen túsindirý jumystaryn ótkizdi.
Qazir tergeý amaldary júrgizilip jatyr.
Tóbelestiń kadry zańger Aigúl Orynbektiń Facebook-tegi paraqshasynda jariialandy.
"Jasóspirimder arasyndaǵy buzaqylyqty aldyn almasaq, bolashaqta túrmeler el buzarlarǵa tolady! Erlan Turǵymbaev myrza jergilikti politsiia inspektorlary mektepterdi aralap "jastar arasyndaǵy qylmysty aldyn alý baǵytynda" túsindirme jumystaryn ótkizý kerek dep oilaimyn", - dep jazdy ol.
Zańgerdiń aitýynsha, Túrkistan oblysy, Kentaý qalasy №1-shi mekteptiń 8-shi synyp oqýshysy jábirlenýshini birneshe qyz bolyp asa qatygezdikpen sabaǵan.
"Barlyǵyn videoǵa túsirip turǵan. Oqiǵa bolǵan oryn - Kentaý qalasy 22-shi mekteptiń territoriiasy. Qazirgi ýaqytta taiaq jegen 14 jastaǵy oqýshy qyz Kentaý qalalyq aýrýhanasynyń travmatologiia bóliminde jatyr. Qyzdyń anasynyń aitýynsha, dárigerler tiisti meditsinalyq saraptamalardy bermei otyr. Ýchaskelik politsiia kelip shaǵym alǵannan ári is qozǵalmai tur. Isti jyly japqylary keledi deidi. Mektep ákimshiligi tarapy únsiz. Qyz mektepke barýdan bas tartyp jatyr deidi anasy. Jaqyndary qyzdyń psihikalyq jaǵdaiy alańdatyp otyrǵanyn aitady", - dep jazdy ol.
