Foto: Dina Tańsáriniń Instagram paraqshasy
Oqiǵa 26 sáýir kúni keshki saǵat 8-der shamasynda Túrkistan oblysy Kentaý qalasynda bolǵan. Oqýshy qyzdy qan-josa etken er kisini kórshiler kórip qalǵan. Bul týraly "Ne molchi" qory habarlady, - dep jazady Massaget.kz portaly otyrar.kz-ke silteme jasap.
11 jastaǵy oqýshy dúkenge maionez alý úshin shyqqan. Úidiń kire-berisinde álgi erkek onyń jasyn surap, ádemi ekenin aityp, qushaqtap alǵan.
"Qyz aiǵailap kómek suraimyn degenshe, er adam onyń tamaq tusynan qatty qysyp, qylqyndyra bastaǵan, uryp-soqqan. Keiin qyzdy aýlaǵa alyp shyǵyp, uryp-soǵýdy jalǵastyrǵan. Tipti basynan, betinen taspen urǵan. Úidiń artyna deiin súirep aparyp, uryp-soǵa bergen. Qyzǵa shabýyldaǵan adam ony zorlamaq bolǵan", - dep jazdy qoǵam belsendisi Dina Tańsári.
Oqiǵany qyzdyń kórshisi kórip qalǵan soń er kisi qasha jónelipti.
Bul boiynsha politsiiaǵa aryz túsken. Tańsáriniń málimetinshe, tártip saqshylary isti "Buzaqylyq" babymen tirkep, kúdiktini bosatyp jibergen.
Túrkistan oblysynyń densaýlyq saqtaý basqarmasyndaǵylar oqýshynyń soqqyǵa jyǵylǵanyn rastady. Ol jedel járdem qyzmetimen aýrýhanaǵa jetkizilgen.
"26 sáýir saǵat 22:00-de bas mi jaraqatyn alǵan 2012 jyly týǵan qyz Kentaý qalalyq ortalyq aýrýhanasyna jetkizildi. Barlyq meditsinalyq tekserýden ótken soń naýqas travmatologiia bólimine jatqyzyldy. Qazirgi tańda sol bólimde em qabyldaýda. Jaǵdaiy ortasha aýyrlyqta", - dep habarlady densaýlyq saqtaý basqarmasy.
Al oblystyq politsiia departamentindegiler bul oqiǵa boiynsha ázirshe túsinik bermegen.
