Foto: elements.envato.com
Kentaý qalasynda qoǵamdyq dámhanadan ýlanǵandar sany saǵat saiyn artyp barady, dep habarlaidy Sputnik Qazaqstan.
Túrkistandaǵy óńirlik kommýnikatsiialar qyzmetinde shuǵyl túrde brifing ótti. Brifingte qazirgi ýaqytta astan ýlanǵandar sany 92-ge jetkeni aityldy.
"Juqpaly aýrýlar bólimshesine 92 adam shaǵymdanyp kelgen. Barlyǵynyń ystyǵy kóterilip, ishteri ótken. 26 maýsymda Kentaý qalasynyń dámhanasynan tamaq ishken. Qazirgi tańda 67 naýqas jatqyzyldy. Onyń 40-y bala, 27 - eresek adam, 3 - júkti áiel. Barlyǵynyń jaǵdaiy ortasha aýyr. Erteńgi kúnnen bastap jaǵdailary jaqsarsa, úiine shyǵaryla bastaidy", - deidi Kentaý qalalyq ortalyq aýrýhana bas dárigeriniń orynbasary Asylbek Ótebaev.
25 adam ambýlatoriialyq emdeýde, olardyń da jaǵdaiy qatań baqylaýda.
Juqpaly aýrýlar bólimshesinde 40 oryn bolǵan, qosymsha 40 tósek-oryn qoiylǵan.
Naýqastardyń kóbi pitstsa jegen.
"Naýqastardyń sany áli de kóbeiýi múmkin. Alaida aldyńǵy kúnge qaraǵanda naýqastar sany turaqtalyp keledi", - dedi Asylbek Ótebaev.
Qazirgi kúni tergep-tekserý amaldary júrip jatyr. QK 304 baby 1-bólimimen qylmystyq is qozǵaldy. Nysan tolyq tekserildi. Saraptamalardyń barlyǵy alynyp, zertteýge jiberildi.
