Qaraǵandy oblysynda «ArselorMittal Temirtaý» jumysshylarynyń máselesin sheshý úshin kelisim komissiiasy óz jumysyn bastady. Ony óńir basshysy Jeńis Qasymbek basqardy, dep habarlaidy QazAqparat.
«ArselorMittal Temirtaý» barlyq shahtalarynyń qyzmetkerleri «ArselorMittal Temirtaý» kompaniiasy basshylyǵynyń aldyna óz talaptaryn qoiyp otyr. Osyǵan bailanysty kenshilerdiń máselelerin qaraý úshin kelisim komissiiasy quryldy. Komissiia quramyna kompaniia basshylyǵy, memlekettik organdardyń, kásipodaqtardyń jáne ár shahtanyń bastamashyl jumysshylar tobynyń ókilderi kirdi.
«Qazir eńbek ujymdaryn tolǵandyratyn birqatar problemalar birinshi orynǵa shyqty. Biz bastamashyl toppen birge kompaniia basshylyǵymen talqylaǵymyz keletin máseleler tizimin qurdyq», – dedi «Qorǵaý» kómirshiler kásipodaǵynyń tóraǵasy Evgenii Býslaev.
Ol 12 tarmaqtan turatyn suraqtar tizimin atap ótti. Olardyń arasynda eńbekaqyny kóterý, qaýipsizdikti qamtamasyz etý, shahtalardy materialdyq-tehnikalyq jabdyqtaý jáne t.b. bar.
«Biz «ArselorMittal Temirtaý» qyzmetkerleriniń eńbek jaǵdailary men ómir súrý sapasyn jaqsartý boiynsha mańyzdy ádil sheshimder qabyldaýymyz kerek. Biz bárimiz kásiporyndarymyzdyń turaqty jáne qaýipsiz jumys istegenin qalaimyz. Eń aldymen qyzmetkerlerdiń múddeleri eskerilýi tiis», – dep atap ótti Jeńis Qasymbek.
Eske sala keteiik, 7 qarashada «Abai» shahtasynda kenetten metan tarap, nátijesinde 6 kenshi qaza taýyp, ekeýi zardap shekken bolatyn.
