Biyl naýryzda Qazaqstan naryǵynda A4 formatyndaǵy keńse qaǵazynyń baǵasy orta eseppen 67%-ǵa ósti. Osy oraida QR Indýstriia jáne infraqurylymdyq damý ministrligi qaǵaz baǵasynyń ózgerýi jáne otandyq óndirýshilerge qatysty málimdeme jasady, dep habarlaidy QazAqparat.
«Ótken jyly elimizge A4 formatyndaǵy keńse qaǵazynyń 20,4 mln qaptamasy (51 myń tonna) jetkizildi. Onyń ishinde, 61% (31,3 myń tonna) Resei Federatsiiasynan, 30% (15,1 myń tonna), Túrkiiadan jáne 8% (4 myń tonna) QHR-dan importtaldy. Osylaisha, Qazaqstan naryǵynda A4 formatyndaǵy qaǵaz ónimderiniń basym bóligi «Snegýrochka» jáne SvetoCopy brendterimen usynylǵan», - delingen habarlamada.
Ministrliktiń málimdeýinshe, ótken jyldyń qorytyndysy boiynsha A4 qaptamasynyń ortasha kóterme baǵasy 1,5 myń teńgeni qurady.
Sondai-aq, 2021 jyly otandyq kásiporyndar 600 myń qaptama A4 formatty qaǵaz shyǵardy.
«Biyl naýryz aiyna qarai baǵalar orta eseppen bir myń teńgege nemese 67%-ǵa ósti. Qazir iri jetkizýshiler keńse qaǵazynyń 1 qaptamasyn 3 myń teńge kóterme baǵamen saýdalap jatyr. Baǵanyń ózgerýi Batys Eýropadan qaǵaz shikizatyn aǵartýǵa arnalǵan reagentterdi jetkizýdegi irkilisterge bailanysty jáne Reseide keńse qaǵazyn óndirý kóleminiń qysqarýyna orai oryn alyp otyr», - dep túsindirdi atalǵan vedomstvo qaǵaz baǵasynyń qymbattaýy tóńiregindegi jaǵdaidy.
Búginde Qazaqstanda keńsege arnalǵan qaǵazdy kesý jáne oraý boiynsha 2 zaýyt jumys isteidi.
Ótken jyly atalǵan kásiporyndar 600 myń A4 qaǵaz óndirip, ishki naryqtaǵy tutyný kóleminiń 5%-yn qamtyǵan.
«Qagaz Ordasy» JShS jylyna 3 mln býma, al «Goida.kz» 3,6 mln A4 keńse qaǵazyn shyǵaratyn óndiristik qýatqa ie. Kesýge jáne býyp-túiýge arnalǵan qaǵaz oramdary túrindegi shikizattyń negizgi bóligi RF men Finliandiiada óndiriledi. Alaida, reseilik zaýyttar bul kompaniialarǵa qaǵaz oramdaryn tikelei satpai, olardy Qazaqstandaǵy óz ókilderi («Litan» JShS jáne «Rezervsnab Pliýs») arqyly saýdalaidy. Sáikesinshe, saýda-sattyqty shektep otyr», - dep jazylǵan resmi málimette.
