Shymkenttik turǵyn Abylai Qazybaev - Ekinshi dúniejúzilik soǵysqa qatysyp, Jeńis kúnin Kenigsbergte qarsy alǵan ardagerdiń biri. Sol jyldary maidangerge Kenigsbergti basyp alǵany úshin «Qyzyl Juldyz» ordeni berilgen, dep habarlaidy QazAqparat.
Abylai Qazybaev 1925 jyldyń 1 shilde kúni Túrkistan oblysynyń Qainarbulaq aýylynda dúniege kelgen. 1943 jyly ásker qataryna alynyp, Tashkent qalasynda áskeri daiyndyqtan ótti. Qolyna qarý ustap kórmegen qazaq balasy úshin bul aitarlyqtai qiynǵa soqty. Degenmen ailap úirenýge ýaqyt tapshy bolǵandyqtan, sol kezdiń talabyna tez beiimdelýge týra keldi.
Sodan bozbala 17 jasynda áskerge attanyp, jaý qolynda qalǵan qalalardy azat etýge jolǵa shyqty.
219-shy diviziianyń 2-shi gvardiialyq polki quramynda Harkov, Voroshilov qalalary túbindegi urystarǵa qatysty. 4-Ýkrain, 3-shi Belorýs maidandaryna qatysyp, Sevastopol qalasyn, Latviia, Litvany azat etip, Kenigsberg arqyly Berlinge deiin baryp qaitty. Jeńisten soń 1946-1950 jyldary Pýshkin, Leningrad, Moskva jáne basqa da qalalardy minadan tazartty. 1950 jyly elge oralyp, Shymkent qalasyndaǵy SMÝ-4, Qorǵasyn zaýytynda, TETs-2 kásiporyndarynda jumys istedi.
Soǵys kezinde «Qyzyl Juldyz», II dárejeli «Otan soǵysy», keiin «Eńbek Qyzyl Tý» ordenderimen, «Jaýyngerlik qyzmeti úshin» jáne basqa kóptegen medaldarmen marapattaldy.
Ardager soǵys jyldaryn eske alǵanda erekshe tebireniske túsedi. Joldastary men dostarynyń erlikterin aityp, kóńili qulazyp, kózine jas alyp qalady.
«Ólimmen betpe-bet kelgen kezimiz kóp. Sonyń ekeýi esimde qalypty. Birinde komandirimiz qorǵap qaldy. Qolynda avtomaty bar jaýdyń soldaty sál bolmaǵanda barshamyzdy jairatyp salatyn edi. Tutqiyldan kelgen ony komandirimiz baiqap qalyp, atyp óltirdi. Al, ekinshisi Kenigsberg jerinde boldy. Onda da tý syrtymyzda kelgen jaýdy baiqamai qaldyq. Allanyń qoldaýymen aman qaldyq», - deidi ol.
Jańbyrsha jaýǵan ot pen ottyń ortasynda júrip el qorǵaǵan ardager biyl 97 jasqa toldy. Jarynyń baqilyq bolǵanyna da birshama ýaqyt bolǵan. Qazir ulynan taraǵan nemereleri men shóberelerine aqylshy bolyp otyr.
«Bar tileitinim elde beibitshilik bolsyn. Bizdiń kórgen soǵysty keler urpaqqa kórmesin. Qazir elde barlyǵy bar. Tek táýbe etýimiz kerek. Al, jastar jaqsy oqyp, bilikti maman atanyp elge qyzmet etýi qajet», - deidi omyraýy ordenge toly aqsaqal.
Ardager bos ýaqytynda bolashaq áskeri qyzmetshilerge keńesin berip, arnaiy dárister ótip otyrady. Soǵystaǵy kórgenimen bólisip, jaýdy qalai jeńgenin áńgimeleidi. Jastardy otansúigishtikke baýlityn jiyndarǵa kóptep qatysady.
«Biz qasymyzdaǵy bir nandy bólip jep júrgen zamandastarymyzdyń kóz aldymyzda oqqa ushyp jatqanyn kórdik. Qorshaýǵa da tústik. Degenmen, eptilik tanytyp aman shyqtyq. Munyń barshasyda áýeli Allanyń arqasy dep bilemin. Bir úlken rotadan sanaýly ǵana adamdy kórgende aman qalatynymyzǵa senbedik», - deidi ardager.
