Keńestik kezeńde komsomol biletterin jelpildetip atqa mingen belsendi jastar belgili bir merzimnen keiin kompartiia músheligine qabyldanyp, taqqa minetin. 1991 jyly tamyz búliginen keiin KOKP-nyń jumysyna tyiym salynǵan soń partbiletterin tapsyrǵan kommýnisterdiń birshamasy «Nur Otan» partiiasynyń músheligine ótip aldy. Sóitken keshegi komsomol balalar bul kúnderi shashtary býryl tartyp aǵa býynnyń qataryna qosyldy, áli de memlekettik mekemelerde laýazymdy qyzmetter atqaryp júrgenderi az emes.
Mine, dál osy sheneýnikterdiń qatarynan biylǵy jyldyń 29 qazanynda atalyp ótiletin komsomoldyń 100 jyldyq mereitoiynda ózderiniń shynaiy beinesin tanytatyndar tabylatynyna kúmánimiz joq. Olar sol kúni omyraýyna komsomol belgishelerin taǵyp alyp, ózgelerdiń aldynda ózderin komsomol uiymynyń ustahanasynan shyńdalyp shyqqan myqty maman retinde dáripteidi!.. Árine, zulymdyq imperiiasy kezeńinde jastyq jigerin, qajyr-qairatyn qazaq halqyn bodandyq ezgige salǵan, demokratiialyq kúshterdi basyp janyshtaǵan kommýnistik partiianyń soiylyn soǵýǵa jumsaǵany úshin esh ókinbeidi. Óitýge ne oi órisi jetpeidi, ne jalǵan namysy jibermeidi.
Bulardyń is-áreketi egemendik kezeńinde dúniege kelgen jastarymyzdyń tárbiesi úshin qaterli, memlekettik ideologiiamen úilespeidi jáne «Nur Otan» partiiasynyń ustanymymen de qabyspaidy. Demek, keshegi komsomol balalardyń erteńgi mereitoidaǵy is-áreketterine orai shara qoldanylýy kerek.
Meniń paiymdaýymsha, memlekettik mekemelerde, qoǵamdyq uiymdarda, kópshilik oryndarda, oqý oryndarynda, sondai-aq BAQ pen áleýmettik jeliler arqyly komsomol, kompartiia uiymdaryn jariia dáriptegen sheneýnikterdi anyqtap, olarǵa senimsizdik bildirý, sóitip memlekettik qyzmetten jáne «Nur Otan» partiiasy músheliginen shyǵarylýyna qol jetkizý durys bolmaq. Sondai sharalar memlekettik qyzmetti jat piǵyldy kadrlardan tazartýǵa septigin tigizedi.
Egemen eldigimizdi qurmetteitin azamattar meniń usynysyma qoldaý bildiredi degen oidamyn.
Arman QANI,
Pavlodar qalasy
