Belgili qazaqstandyq biznesmen Keńes Raqyshev Qazaqstan boks federatsiiasynyń prezidenti bolyp sailandy, dep habarlaidy "Ult aqparat".
«Ulttyq olimpiada komitetiniń prezidenti retinde bokstyń damýyna úlesimdi qosa beremin. Alda qoiǵan mindetterdi oryndap kelemiz. Aldaǵy ýaqytta da solai bolaryna senemin. Óz ornyma Keńes Raqyshevty usynamyn», - dedi Timýr Qulybaev búgin elordada ótken Qazaqstan boks federatsiiasynyń otyrysynda.
Federatsiia músheleriniń barlyǵy biraýyzdan Keńes Raqyshevtyń Qazaqstan boks federatsiiasy basshylyǵyna kelýine daýys berdi.
Otyrys barysynda 2009 jyldan beri Qazaqstan boks federatsiiasyn basqaryp kele jatqan Timýr Qulybaevqa «Qazaqstan boks federatsiiasynyń qurmetti prezidenti» ataǵy berildi.
Eske sala ketsek, boks federatsiiasynyń búgingi otyrysynda Qazaqstan boks federatsiianyń prezidenti Timýr Qulybaev qyzmetinen ketetinin málimdegen bolatyn.
