Qazaqstan boks federatsiiasynyń prezidenti Keńes Raqyshev álem birinshiliginiń chempiondary men júldegerlerine óz atynan qosymsha syiaqy beredi. Sportshylar alǵan júldeli orynyna qarai 70, 50 jáne 30 myń dollardan alady, dep habarlady federatsiianyń baspasóz qyzmeti.
"Elge oralǵan bizdiń boksshylarǵa qomaqty aqshalai sertifikat tabystalady: birinshi oryn úshin – 70 myń AQSh dollary, ekinshi – 50 myń, úshinshi – 30 myń. Otandyq boksshylarǵa qoldaý bildireiik! Qazaqstan álemniń qýatty elderi qatarynda boldy jáne árkez bola beredi!" – dep málimdedi federatsiia.
Sonymen qatar sportshylar AIVA tarapynan beriletin 100, 50 jáne 25 myń AQSh dollary kólemindegi kepildendirilgen júlde qoryn da alady.
Qazaq boksshylary Belgradta (Serbiia) ótken álem chempionatynda bes medal jeńip aldy. Finaldyń birinshi kúninde-aq bizdiń sportshylardyń qorjynynda altyn, kúmis jáne qola júlde boldy.
Biraz buryn qylmys áleminiń serkesi Arman Jumageldievtiń (Dikii Arman) álem chempionatyna joldama alǵan qazaqstandyq boksshylarǵa eki myń dollardan úlestirip jatqan videosy jelide tarap, qoǵamda qyzý talqyǵa tústi.
Mádeniet ministrligi ulttyq quramanyń jekelegen boksshylaryna aqsha berý federatsiia men ministrliktiń resmi tulǵasy sanalmaityn azamattyń, iaǵni Armannyń jeke bastamasy ekenin aitty.
"Ulttyq quramanyń jekelegen boksshylaryna aqsha berý federatsiia men ministrliktiń resmi tulǵasy sanalmaityn azamattyń, iaǵni Armannyń jeke bastamasy", - dedi ministrlik.
Ministrlik málimeti boiynsha bokstan ulttyq qurama komanda sportshylaryn daiarlaý jáne olardyń Belgrad qalasyndaǵy kommýnikatsiiasy úshin jaǵdai jasaý boiynsha jaýapkershilik Qazaqstannyń boks federatsiiasyna júktelgen.
Eske salsaq, qazaq boksshylary 2021 jylǵy álem chempionatynda eki altyn, eki kúmis jáne bir qola júlde jeńip aldy. Álem chempionatynyń qorytyndysy boiynsha bas bapker Qairat Sátjanovtyń jetekshiligimen komanda jalpy júlde kestesinde ekinshi oryndy ielendi.
Birinshiliktiń altyn medalin Temirtas Júsipov (48 kg) pen Sáken Bibosynov (51 kg), kúmis – Mahmud Sabyrhan (54 kg) men Serik Temirjanov (57 kg), qola – Abylaihan Júsipov (67 kg) jeńip aldy.
