Ken bailyǵyn halyq biýdjetke túsken salyq arqyly paidalanady. Bul týraly Májilis tóraǵasy Erlan Qoshanov málim etti, dep habarlaidy QazAqparat.
Búgin palatanyń jalpy otyrysynan keiin tilshiler Qoshanovqa Ata Zańǵa jerdiń jáne tabiǵi resýrstardyń iesi halyq degen normany birjola bekitýge qatysty suraq qoidy. Osy oraida bul normaǵa sáikes halyq bul bailyqqa qalai ielik ete alatyny suraldy.
«Negizi, bul norma ádil jáne durys dep oilaimyn. Sebebi jerdiń de, sýdyń da, jerdiń ústindegi de, astyndaǵy da bailyqtyń iesi halyq bolýy kerek. Sondyqtan Prezidenttiń usynysymen osy norma engizildi. Bul bailyqty halyq qalai paidalana alady? Ken oryndaryn qaraityn bolsaq, olardy igeretin investorlardyń, kompaniialardyń tólegen salyǵy, ashqan jumys oryndary arqyly biýdjetke qarajat túsedi. Al biýdjetke túsken qarajat arqyly áleýmettik máseleler sheshiledi. Bul uǵymdy durys túsiný kerek. Konstitýtsiiaǵa engizilgen ózgeris degenimiz ken oryndarynyń bárin kompaniialardan nemese investorlardan qaita tartyp alý degendi bildirmeidi. Eger olar zańdy buzbai jumys istese, onda jumysyn ári qarai jalǵastyra beredi. Biraq zańdy buzsa, onda onymen basqa organdar ainalysady», - dedi Májilis tóraǵasy.
