Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine eńbek máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy QazAqparat.
Zań jobasy Qazaqstan Respýblikasynyń 2010 - 2020 jyldarǵa arnalǵan quqyqtyq saiasat tujyrymdamasyna sáikes,áleýmettik áriptestermen jáne múddeli memlekettik organdarmen birlesip ázirlendi jáne eńbek qatynastaryn, áleýmettik áriptestikti, eńbek qaýipsizdigi men eńbekti qorǵaýdy retteýge baǵyttalǵan.
QR Eńbek jáne halyqty áleýmettik qorǵaý ministri Birjan Nurymbetovtiń sózine qaraǵanda, qazirgi ýaqytta teń eńbek jaǵdailaryn qamtamasyz etpeý boiynsha kemsitý faktilerine jol bergeni úshin ákimshilik jaýapkerlik zańnamalyq túrinde joq. Osyǵan bailanysty zań jobasynda jumyskerdiń laiyqty eńbek jáne turmys jaǵdailaryna quqyǵyn belgileý ári ákimshilik zańnamaǵa teń eńbek jaǵdailaryn qamtamasyz etpeý boiynsha kemsitý faktilerine jol bergeni úshin jumys berýshilerdi jaýapkershilikke tartýǵa negizdeme engizý usynylady.
«Qoldanystaǵy Eńbek kodeksi boiynsha jumyskerdiń áskerge shaqyrylýy eńbek shartyn toqtatýǵa negizdeme bolyp tabylady. Osyǵan bailanysty, merzimdi áskeri boryshyn ótep júrgen azamattardyń jumys ornyn saqtaý, sondai-aq olarǵa jalaqysy saqtalmaityn demalys berý boiynsha jumys berýshiniń mindetterin bekitý usynylady. Bul rette, jumyskerdiń áskerden qaittyp kelgen kúnnen bastap bir aidyń ishinde óz jumysyna kirisý mindeti bekitiledi», - dedi ministr.
Onyń aitýynsha, búginde jalaqysy saqtalmaityn demalys taraptardyń kelisýi boiynsha beriledi. Alaida, otbasynyń naýqas múshesiniń kútimi boiynsha uzaq demalys qajet bolǵan kezde jumyskerler jalaqysy saqtalmaityn demalys ala almai, sonyń saldarynan jumystan shyǵýǵa májbúr bolyp jatady. Osy oraida meditsinalyq qorytyndyǵa sáikes, kútimdi qajet etetin otbasy múshesine kútim jasaý úshin jumyskerlerge tolyq emes jumys ýaqyty rejimin engizý usynylady.
«Kelissózder júrgizý jáne ujymdyq sharttarǵa qol qoiý barysynda barlyq jumyskerlerdiń pikirin eskerý maqsatynda, kásipodaq músheleri bolyp sanalmaityn jumyskerlerdiń múddelerin bildirý boiynsha sailanbaly ókilderdiń ókilettigin bekitý josparlanýda. Budan bólek, jeke eńbek daýyn retteýdiń sotqa deiingi tártibin naqtylaý maqsatynda jumys berýshige kelisim komissiialaryn qurýdy mindetteý usynylady», - dedi B. Nurymbetov.
Atalǵan zań jobasy aiasynda eńbek sharttaryn jasasý jáne esepke alý protsesin avtomattandyrý maqsatynda «eńbek sharttaryn esepke alýdyń biryńǵai júiesi» degen uǵym engizilip otyr.
