Kemerovodaǵy «Zimniaia vishnia» SO-da órt ǵimarattyń shatyrynda elektr symdarynyń qysqa tuiyqtalýynan bastalǵan. Zertteý jumystary Resei TJM Sankt-Peterbýrg ýniversitetiniń órtti zertteý ortalyǵynda júrgizildi. Saraptamanyń aldyn ala nátijelerin kommersant.ru saity jariialady, dep habarlaidy Baq.kz aqparat agenttigi.
«Sarapshylardyń aldyn ala qorytyndysy boiynsha tórtinshi qabatta balalardyń oiyn alańynyń ústinde elektr symdarynyń qysqa tuiyqtalýy oryn alǵan. Saýda úiiniń shatyry qardan tazalanbaǵan, ol erigen, sodan soń sý symdarǵa tie bastaǵan. Alǵash bolyp balalardyń qurǵaq basseininiń ústinde ilýli turǵan aspasham janǵan. Ol ústinen tamyp turǵan plastiktiń kesirenen órtengen», - delingen jariialymda.
Ortalyq sarapshylarynyń aitýynsha, órt sonshalyqty qatty bolmaýy kerek edi, alaida qosýly turǵan aýa almastyrǵysh órtti órshitip jibergen. Osylaisha ǵimarattyń ústińgi qabatyn jyldam kók tútin basady. Dál osy kezde kinozaldardyń birinde seans aiaqtalady. Ókinishke orai ǵimarattan shyǵyp, aman qalǵandar sanaýly boldy. Kinozaldan shyǵyp úlgergenderdiń biri qosalqy esikke barady, alaida ol jabyq bolyp shyǵady. Shyǵa almaǵandar zalda qaitys bolady.
Sonymen qatar, saýda úiinde elektr symdarynyń qysqa tuiyqtalýynan saqtaityn avtomatty sóndirgishter ornatylǵan, alaida olar qosylmai qalǵan.
Esterińizge sala keteiik, Kemerovodaǵy «Zimniaia vishnia» saýda ortalyǵynda 25 naýryzda órt boldy. Ǵimarattan 64 adam shyǵa almai ajal qushty. Onyń ishinde 41 bala boldy. Qylmystyq is birneshe baptar boiynsha qaralýda, jeti adam qamaýǵa alynǵan.
Qazaqstan Prezidenti oryn alǵan qaiǵyly oqiǵaǵa kóńil aitty. Sonymen qatar, elimizde qurban bolǵan jandardyń qurmetine eske alý sharalary ótkizildi jáne jergilikti saýda oiyn saýyq ortalyqtaryn jappai tekserý bastaldy.
