QR Qarjy ministrligi 2019-2021 jyldarǵa arnalǵan respýblikalyq biýdjetti tanystyrdy, dep xabarlaidy "Ult aqparat".
Ministrdiń mindetin atqarýshy Berik Sholpanqulovtyń aitýynsha, úsh jylda áleýmettik salaǵa 15,4 trln teńge bólinedi. Atalǵan shyǵystardyń basym bóligi - áleýmettik kómek qarjysy.
«Jalpy, úsh jyl ishinde áleýmettik qamsyzdandyrýǵa 9,5 trln teńge bólinedi. Sonyń ishinde 2019 jylǵa 3 trln teńge josparlanǵan. Bunyń barlyǵy - áleýmettik tólemder. Ol aqshaǵa zeinetaqy men járdemaqy tólenedi. Sonyń nátijesinde kelesi jyly zeinetaqynyń minimaldy mólsheri 36 108 teńge, al bazalyq zeinetaqynyń ortasha kólemi 27 732 teńge bolady. Osylaisha, 2019 jyldyń 1 qańtarynan bastap respýblika boiynsha zenetaqynyń ortasha kólemi 87 243 teńgege deiin ósedi. Ol 5 728 teńgege artyq», - dedi B.Sholpanqulov Parlament Májilisinde.
Aita keteiik, búgingi otyrysta QR Ulttyq ekonomika ministri Timýr Súleimenov depýtattarǵa 2019-2023 jyldarǵa arnalǵan ekonomikalyq damý boljamyn da tanystyrdy.
«2019 jyly munai baǵasynyń bir barreli 66,7 AQSh dollaryn quraidy degen boljam bar. Osyny eskere otyryp, bazalyq stsenariide munaidyń baǵasy 60 AQSh dollary deńgeiinde alyndy. 2019 jyly jalpy ishki ónim 3,9 protsent deńgeiinde, al 2023 jyly 4,6 protsentke deiin ósedi. Atalǵan kezeńde jalpy ishki ónimniń ortasha jyldyq ósý qarqyny 4,2 protsent bolady degen boljam bar», - deidi T.Súleimenov.
Onyń aitýynsha, kelesi jyly nominaldy jalpy ishki ónim 64,1 trln teńge bolsa, 2023 jylǵa deiin atalǵan kórsetkish 86,9 trln teńgege deiin ósedi. Osylaisha, jan basyna shaqqandaǵy jalpy ishki ónim 9,9 myń AQSh dollarynan 12,9 myń dollarǵa deiin ulǵaiady.
«Orta merzimdi perspektivada ónim óńdeý, agroónerkásip, qurylys, kólik-logistika jáne qyzmet salasy ekonomikalyq ósimniń negizgi qozǵaýshy kúshi bolady. Munai óndirý kólemi 99 mln tonnaǵa deiin ósedi. Eksport kólemi 56,5 mlrd AQSh dollarynan 68,5 mlrd dollarǵa deiin artady. Al import 41,9 mlrd AQSh dollaryna deiin ulǵaiady. Ulttyq bank infliatsiianyń jyldyq kórsetkishin 2019 jyly 4-6 protsent deńgeiinde saqtaidy. 2020-2023 jyly ol 3-4 protsentke deiin tómendeidi», - dep atap kórsetti T.Súleimenov.
