Mańǵystaý oblysynyń ákimi Nurlan Noǵaev óńirdegi aýyz sý tapshylyǵy máselesin sheshý úshin qabyldap jatqan sharalaryna toqtaldy, dep habarlaidy QazAqparat.
«Oblystyń damýy men halyq sanynyń qarqyndy ósýine orai óńirde sýǵa degen suranys artyp keledi. Búgingi kúni oblys 154 myń tekshe metr sý tutynady. Jaz mezgilinde mamyr aiynan qyrkúieek deiin 51 myń tekshe metr sý jetispeidi. Al, 2025 jylǵa qarai tutyný 250-260 myń tekshe metrge jetedi degen boljam bar», - dedi N. Noǵaev Ortalyq kommýnikatsiialar qyzmetinde ótken brifingide.
Ákimniń aitýynsha, sý tapshylyǵyn joiý jóninde oblysta 9 joba iske asyp jatyr.
«Onyń ekeýi kelesi jyldyń birinshi jartyjyldyǵynda bastalady. Birinshisi – Aqtaý qalasynda «Kaspii» sý tushytý zaýytynyń qýatyn 20 myńnan 40 myń tekshe metrge deiin jetkizý. Ekinshisi – Qarajanbas ken ornynda táýligine 17 myń tekshe metr sý tushytatyn zaýyt biyl iske qosylady. Sonda 51 myń tekshe metrdiń 31 myńy qamtamasyz etiledi. Saitta kórsetilgendei, 9 joba júieli túrde júzege asyrylýda. Máselen, «QazMunaiGaz» kompaniiasy Kendirli aýylynda táýligine 50 myń tekshe metr sý tushytý zaýytyn salyp jatyr», - dedi N. Noǵaev.
Spiker Memleket basshysynyń óńirdegi aýyz sý tapshylyǵyn sheshý úshin naqty tapsyrmalardy júktegenin eske saldy.
«Biz belsendi jumysty bastadyq, investorlarmen kelissózder júrgizýdemiz, basqa elderdiń tájiribesin zerdeleýdemiz. Qazir Mańǵystaý oblysynda aýyz sý tapshylyǵy máselesin sheshý bizdiń basty mindetimiz bolyp otyr. Aqtaý qalasy, Jańaózen jáne Fort-Shevchenko qalalarynda aýyz sýmen qamtamasyz etý 100 paiyzǵa jasaqtalǵan. Qazirgi ýaqytta aýyldyq eldimekenderdi qamtý ótken jyly 92 paiyz bolsa, biylǵy jyldyń qorytyndysy boiynsha 96,2 paiyz bolady.
Oblysta barlyǵy 59 aýyldyq eldimeken bar, sonyń 47-si aýyz sýmen qamtylǵan. 12 aýyldy Prezident 2022 jylǵa deiin ortalyqtandyrylǵan sýmen qamtamasyz etýdi tapsyrdy. Biyl ortalyqtandyrylǵan sýmen 2 aýyl qamtylady: Beki jáne Basqudyq. Nátijesinde eldi mekenderdi ortalyqtandyrylǵan aýyz sýmen qamtamasyz etý 96%-ǵa jetedi. Qalǵan 10 aýyldy aýyz sýmen qamtýdy 2022 jyldyń sońyna deiin aiaqtaý josparlanýda», - dedi N. Noǵaev.
