2019 jyldan bastap informatika páni 1-synyptan oqytylady. Bul týraly búgin QR Parlamenti Senatyndaǵy Úkimet saǵatynda Bilim jáne ǵylym vitse-ministri Elmira Sýhanberdieva aitty, dep habarlaidy "Ult aqparat".
«2017-2019 jyldary barlyq mektepti keń jolaqty internetke tegin qosýǵa qarjy qarastyrylǵan. Bul rette keibir óńirlerde mektepterdiń kabeldik internetke qosylmaýyna bailanysty 2017 jyly 2756 mektep, 2018 jyly 460 mektep spýtnik bailanysy arqyly internetpen qamtamasyz etildi. Bilim berýdi tsifrlandyrý aiasynda mektepterdiń 95 paiyzy internetke qosylatyn bolady», - dedi ol.
Onyń sózine qaraǵanda, Oqýshylar sarailary men 3 myń mektepte robototehnika boiynsha elektivti kýrstar engizildi. Robototehnika kabinetterin jabdyqtaý boiynsha sharalar qabyldanyp jatyr.
«Biyl informatika páni 3-synyptan bastaldy. «Tsifrlyq Qazaqstan» baǵdarlamasy aiasynda informatika sabaǵy kelesi jyldan bastap 1-synyptan oqytylady. Olardyń baǵdarlamasy daiyndalyp jatyr. Sonymen qatar barlyq óńirde 21 IT-litsei ashyldy», - dedi Elmira Sýhanberdieva.
Eske salaiyq, Astanada ótken «Digital Bridge» halyqaralyq innovatsiialyq forýmynda QR Premer-Ministri Baqytjan Saǵyntaev informatika páni 1-synyptan bastap oqytylýy múmkindigin aitqan bolatyn.
