© Sputnik / Vladislav Vodnev
Biyl 1 aqpannan bastap Qazaqstanda elektr energiiasy qymbattaýy múmkin. Energetika ministrligi elektr energiiasyna shekti tarifterdi bekitýge nietti.
Biryńǵai satyp alýshy úshin elektr energiiasynyń quny kVt/saǵatyna shamamen 2 teńgege (3 tsent) ósýi múmkin. Vedomstvo buiryqty "Ashyq NQA" portalyna ornalastyrdy. Sondai-aq ministrlik energiia óndirýshi 36 uiym 1 aqpannan bastap elektr energiiasynyń shekti tarifin túzetýge ótinim bergenin habarlady.
Elektr baǵasyn kóterýdegi negizgi maqsat - óndiristik mamandardyń jalaqysyn arttyrý. Byltyr ortasha jalaqy 18%-ke artyp, 425 myń teńge boldy. Al biyl 15-20%-ke ulǵaitý josparlanýda, bul oraida jalaqy ortasha eseppen 490 myń teńgege kóteriledi.
"Energetika sektorynda bilikti maman tapshy. Energetika kásiporyndarynda 4,5 myń maman jetispeidi. 2024 jylǵy 1 qańtardaǵy jaǵdai boiynsha qyzmetkerlerdiń naqty sany 52,5 myń adam boldy. Jalaqyny ulǵaitý saladaǵy mamandardy tartýǵa jáne ustap qalýǵa baǵyttalǵan", - dep habarlady energetika ministrligi.
Sonymen qatar otyn satyp alý jáne kómir men gazdy tasymaldaý shyǵyndary artty. Tarifti túzetýge áser etetin faktorlar: jóndeý naýqany, energiia óndirýshi obektilerdiń, onyń ishinde metaldyń qymbattaýy. Obektilerdiń turaqty jumys isteýine qajetti materialdar men jabdyqtar jáne tasymaldaý quny ósken.
"Qazirgi ýaqytta energiia óndirýshi uiymdardyń ótinimderi qaraý satysynda tur. Barlyq usynys tutynýshylardyń múddeleri men salanyń turaqty damýy arasyndaǵy tepe-teńdikti saqtaý úshin muqiiat taldanady", - dep atap ótti energetika ministrligi.
Aita keteri, buiryq 2025 jyldyń 1 aqpanynan bastap qoldanysqa engiziledi.
