Maining-fermalar óz qyzmetin eldiń energetikalyq qaýipsizdigine ziian keltirmei júrgizýi kerek. «KEGOC» aktsionerlik qoǵamynyń resmi saitynda eldegi elektr energiiasynyń tapshylyǵy týraly alyp-qashpa áńgimelerge qatysty resmi málimdeme jariialandy, dep habarlaidy QazAqparat.
«Keiingi kezde BAQ-ta Qazaqstannyń energiia júiesindegi jaǵdai boiynsha túrli materialdar, onyń ishinde qate aqparaty bar materialdar jariialanyp jatyr. Qazaqstan Respýblikasy birtutas elektr energetikalyq júiesiniń júielik operatory «KEGOC» AQ osyǵan bailanysty kelesini habarlaidy», - delingen resmi málimdemede.
Aktsionerlik qoǵamnyń saityndaǵy málimetke súiensek, 10 qarashadaǵy jaǵdai boiynsha Qazaqstanda elektr qýatyn tutyný kólemi 14 838 MVt, óndirý kólemi 14 265 MVt bolǵan. Iaǵni, tapshylyq 573 MVt bolyp otyr. Onyń orny Resei Federatsiiasynyń energiia júiesinen keletin aǵyndarmen toltyrylǵan.
«Jyl basynan beri kómir elektr stantsiialaryndaǵy elektr óndirý kólemi 66,9 mlrd kVt/caǵat bolǵan. Bul elde óndiriletin búkil elektr energiiasynyń 69%-y degen sóz. Gaz elektr stantsiialary 18,9 mlrd kVt/caǵat nemese 19,5%, sý elektr stantsiialary 7,4 mlrd kVt/caǵat nemese 8%, jel elektr keshenderi 3,6 mlrd kVt/caǵat (shamamen 3,5%) óndirdi. 27 qarashada Ekibastuz GRES-2 nysanyndaǵy qýaty 500 MVt bolatyn №2 energetikalyq blokta jóndeý jumystary aiaqtalady. 11 qarashada Ekibastuz GRES-1 nysanyndaǵy qýaty 500 MVt bolatyn №7 energoblokta josparly jóndeý aiaqtaldy. «EEK» AQ elektr stantsiiasyndaǵy №4 blok ta josparly jóndeýde tur. Ondaǵy týrbina men bir qazandyq 12 qarashada jóndelip bitedi», - dep jazylǵan kompaniianyń resmi saitynda.
Kompaniianyń esebi boiynsha, atalǵan nysandardyń jelige qosylýy eldegi elektr energiiasyn óndirý múmkindigin aitarlyqtai arttyrady.
«8 qarashada Moinaq sý elektr stantsiiasyna sýdyń qajetti deńgeii jinaqtalyp, qosymsha 300 MVt qýat iske qosyldy. Budan bólek jalpy jiyntyq qýaty 1150 MVt bolatyn dergilikti kózder avariialyq jóndeýde tur», - delingen resmi málimdemede.
«Qarasha aiynan bastap «Shyǵysenergotreid» JShS, «Sevkazenergo» AQ, «Astanaenergosbyt» JShS, «Energopotok» JShS siiaqty jergilikti kompaniialarda elektr ajyratylsa, bul aqaýdyń jelilerdi kelisimsharttan tys paidalanýdan týyndaǵanyn habarlaimyz. Kelisimsharttan tys paidalanýdy shekteý úshin QR Úkimetimen birlesip, júieli sharalar qabyldanýda. 11 qarashadaǵy jaǵdai boiynsha Jambyl GRES-inde qýaty 200 MVt bolatyn qosymsha energiia blogy iske qosyldy», - dep jazady kompaniianyń saity.
Sondai-aq, resmi málimdemede tutynýshylardy elektr energiiasymen qamtamasyz etý úshin Resei Federatsiiasynan elektr importtalyp jatqany aitylǵan.
«Zańnama talaptary boiynsha, maining-fermalar óz qyzmetin eldiń energetikalyq qaýipsizdigine ziian keltirmesten júzege asyrýy kerek. Tipti sol úshin importtalǵan elektr energiiasyn da satyp alýy qajet. «Kóleńkedegi» maining-fermalardy anyqtaý úshin sala sýbektilerine qoiylatyn talaptardy normativtik-quqyqtyq bazamen bekitý kerek. Bizdiń baǵalaýymyz boiynsha, tirkelgen maining-fermalar shamamen 600 MVt elektr energiiasyn tutynyp otyr. Al «kóleńkedegi» maining-fermalardyń qajettiligi 300-400 MVt bolady. Kúz-qys maýsymynda eń joǵary júkteme 17 000 MVt bolýy múmkin. Al eldegi energiia generatsiialaý júiesiniń múmkindigi 16 540 MVt bolady dep kútilýde. 540 MVt tapshylyq Reseiden keletin import esebinen óteledi», - delingen resmi málimette.
