ماينينگ-فەرمالار ٶز قىزمەتٸن ەلدٸڭ ەنەرگەتيكالىق قاۋٸپسٸزدٸگٸنە زييان كەلتٸرمەي جٷرگٸزۋٸ كەرەك. «KEGOC» اكتسيونەرلٸك قوعامىنىڭ رەسمي سايتىندا ەلدەگٸ ەلەكتر ەنەرگيياسىنىڭ تاپشىلىعى تۋرالى الىپ-قاشپا ەڭگٸمەلەرگە قاتىستى رەسمي مەلٸمدەمە جارييالاندى, دەپ حابارلايدى قازاقپارات.
«كەيٸنگٸ كەزدە باق-تا قازاقستاننىڭ ەنەرگييا جٷيەسٸندەگٸ جاعداي بويىنشا تٷرلٸ ماتەريالدار, ونىڭ ٸشٸندە قاتە اقپاراتى بار ماتەريالدار جارييالانىپ جاتىر. قازاقستان رەسپۋبليكاسى بٸرتۇتاس ەلەكتر ەنەرگەتيكالىق جٷيەسٸنٸڭ جٷيەلٸك وپەراتورى «KEGOC» اق وسىعان بايلانىستى كەلەسٸنٸ حابارلايدى», - دەلٸنگەن رەسمي مەلٸمدەمەدە.
اكتسيونەرلٸك قوعامنىڭ سايتىنداعى مەلٸمەتكە سٷيەنسەك, 10 قاراشاداعى جاعداي بويىنشا قازاقستاندا ەلەكتر قۋاتىن تۇتىنۋ كٶلەمٸ 14 838 مۆت, ٶندٸرۋ كٶلەمٸ 14 265 مۆت بولعان. ياعني, تاپشىلىق 573 مۆت بولىپ وتىر. ونىڭ ورنى رەسەي فەدەراتسيياسىنىڭ ەنەرگييا جٷيەسٸنەن كەلەتٸن اعىندارمەن تولتىرىلعان.
«جىل باسىنان بەرٸ كٶمٸر ەلەكتر ستانتسييالارىنداعى ەلەكتر ٶندٸرۋ كٶلەمٸ 66,9 ملرد كۆت/cاعات بولعان. بۇل ەلدە ٶندٸرٸلەتٸن بٷكٸل ەلەكتر ەنەرگيياسىنىڭ 69%-ى دەگەن سٶز. گاز ەلەكتر ستانتسييالارى 18,9 ملرد كۆت/cاعات نەمەسە 19,5%, سۋ ەلەكتر ستانتسييالارى 7,4 ملرد كۆت/cاعات نەمەسە 8%, جەل ەلەكتر كەشەندەرٸ 3,6 ملرد كۆت/cاعات (شامامەن 3,5%) ٶندٸردٸ. 27 قاراشادا ەكٸباستۇز گرەس-2 نىسانىنداعى قۋاتى 500 مۆت بولاتىن №2 ەنەرگەتيكالىق بلوكتا جٶندەۋ جۇمىستارى اياقتالادى. 11 قاراشادا ەكٸباستۇز گرەس-1 نىسانىنداعى قۋاتى 500 مۆت بولاتىن №7 ەنەرگوبلوكتا جوسپارلى جٶندەۋ اياقتالدى. «ەەك» اق ەلەكتر ستانتسيياسىنداعى №4 بلوك تا جوسپارلى جٶندەۋدە تۇر. ونداعى تۋربينا مەن بٸر قازاندىق 12 قاراشادا جٶندەلٸپ بٸتەدٸ», - دەپ جازىلعان كومپانييانىڭ رەسمي سايتىندا.
كومپانييانىڭ ەسەبٸ بويىنشا, اتالعان نىسانداردىڭ جەلٸگە قوسىلۋى ەلدەگٸ ەلەكتر ەنەرگيياسىن ٶندٸرۋ مٷمكٸندٸگٸن ايتارلىقتاي ارتتىرادى.
«8 قاراشادا مويناق سۋ ەلەكتر ستانتسيياسىنا سۋدىڭ قاجەتتٸ دەڭگەيٸ جيناقتالىپ, قوسىمشا 300 مۆت قۋات ٸسكە قوسىلدى. بۇدان بٶلەك جالپى جيىنتىق قۋاتى 1150 مۆت بولاتىن دەرگٸلٸكتٸ كٶزدەر اۆارييالىق جٶندەۋدە تۇر», - دەلٸنگەن رەسمي مەلٸمدەمەدە.
«قاراشا ايىنان باستاپ «شىعىسەنەرگوترەيد» جشس, «سەۆكازەنەرگو» اق, «استاناەنەرگوسبىت» جشس, «ەنەرگوپوتوك» جشس سيياقتى جەرگٸلٸكتٸ كومپانييالاردا ەلەكتر اجىراتىلسا, بۇل اقاۋدىڭ جەلٸلەردٸ كەلٸسٸمشارتتان تىس پايدالانۋدان تۋىنداعانىن حابارلايمىز. كەلٸسٸمشارتتان تىس پايدالانۋدى شەكتەۋ ٷشٸن قر ٷكٸمەتٸمەن بٸرلەسٸپ, جٷيەلٸ شارالار قابىلدانۋدا. 11 قاراشاداعى جاعداي بويىنشا جامبىل گرەس-ٸندە قۋاتى 200 مۆت بولاتىن قوسىمشا ەنەرگييا بلوگى ٸسكە قوسىلدى», - دەپ جازادى كومپانييانىڭ سايتى.
سونداي-اق, رەسمي مەلٸمدەمەدە تۇتىنۋشىلاردى ەلەكتر ەنەرگيياسىمەن قامتاماسىز ەتۋ ٷشٸن رەسەي فەدەراتسيياسىنان ەلەكتر يمپورتتالىپ جاتقانى ايتىلعان.
«زاڭناما تالاپتارى بويىنشا, ماينينگ-فەرمالار ٶز قىزمەتٸن ەلدٸڭ ەنەرگەتيكالىق قاۋٸپسٸزدٸگٸنە زييان كەلتٸرمەستەن جٷزەگە اسىرۋى كەرەك. تٸپتٸ سول ٷشٸن يمپورتتالعان ەلەكتر ەنەرگيياسىن دا ساتىپ الۋى قاجەت. «كٶلەڭكەدەگٸ» ماينينگ-فەرمالاردى انىقتاۋ ٷشٸن سالا سۋبەكتٸلەرٸنە قويىلاتىن تالاپتاردى نورماتيۆتٸك-قۇقىقتىق بازامەن بەكٸتۋ كەرەك. بٸزدٸڭ باعالاۋىمىز بويىنشا, تٸركەلگەن ماينينگ-فەرمالار شامامەن 600 مۆت ەلەكتر ەنەرگيياسىن تۇتىنىپ وتىر. ال «كٶلەڭكەدەگٸ» ماينينگ-فەرمالاردىڭ قاجەتتٸلٸگٸ 300-400 مۆت بولادى. كٷز-قىس ماۋسىمىندا ەڭ جوعارى جٷكتەمە 17 000 مۆت بولۋى مٷمكٸن. ال ەلدەگٸ ەنەرگييا گەنەراتسييالاۋ جٷيەسٸنٸڭ مٷمكٸندٸگٸ 16 540 مۆت بولادى دەپ كٷتٸلۋدە. 540 مۆت تاپشىلىق رەسەيدەن كەلەتٸن يمپورت ەسەبٸنەن ٶتەلەدٸ», - دەلٸنگەن رەسمي مەلٸمەتتە.
