Monopoliiaǵa qarsy departament "Ksell" AQ men "Mobail Telekom-Servis" JShS-ǵa (Tele2/Altel birikken kompaniiasy - esk.) qatysty tergeýdi bastady. Bul týraly Básekelestikti qorǵaý jáne damytý agenttigi habarlady.
"17 maýsymda Almaty qalasy boiynsha monopoliiaǵa qarsy departament «Ksell» AQ men «Mobail Telekom-Servis» JShS-ǵa qatysty monopoliialyq joǵary baǵalardy belgileý bóliginde tergep-tekserýlerdi bastady.
«Ksell» AQ-ǵa qatysty: Azamattardyń uialy bailanys operatorlarynyń baǵasynyń ósýine jii júginýlerine bailanysty Básekelestikti qorǵaý jáne damytý agenttigi 2020-2021 jyldary uialy bailanys jáne mobildi internet qyzmetteriniń tarifterin taldady. Quramyna "Ksell" AQ jáne "Mobail Telekom-Servis" JShS kiretin "Qazaqtelekom"AQ tobynyń (35% - dan astam) ústem jaǵdaiy anyqtaldy" - delingen habarlamada.
Vedomstvo málimetinshe, "Ksell" AQ taldaý kezeńinde uialy bailanys (orta eseppen 756 teńge) jáne mobildi internet (orta eseppen 1765 teńge) qyzmetterine eń joǵary baǵa belgilegen.
"Mysaly, birqatar operatorda uialy bailanys qyzmetterine eń tómengi baǵa orta eseppen 332 teńgeni, mobildi internet qyzmetterine - orta eseppen 1022 teńgeni qurady.
Monopoliiaǵa qarsy zańnamany buzý belgileriniń anyqtalýyna bailanysty, uialy bailanys jáne internet qyzmetterine monopoliialyq joǵary baǵalardy belgileý belgileri boiynsha «Ksell» AQ-ǵa qatysty tergep-tekserý bastaldy" - delingen vedomstvo habarlamasynda.
Sondai-aq, agenttik «Mobail Telekom-Servis» JShS-ǵa qatysty 2020-2021 jyldary SMS-taratý qyzmetteri naryǵyndaǵy baǵa monitoringiniń qorytyndysy boiynsha basqa bailanys operatorlarymen salystyrǵanda, «Mobail Telekom-Servis» JShS-nyń baǵalardy ósirgenin anyqtaǵan.
"Bailanys operatorlary 2021 jyly 2020 jylmen salystyrǵanda SMS-taratý tarifterin orta eseppen 14,03%-ǵa arttyrǵan. Bul rette, eń joǵary ortasha baǵa «Qazaqtelekom» AQ tobyna kiretin «Mobail Telekom-Servis» JShS-da jáne «KaR-Tel» JShS-men salystyrǵanda «Ksell» AQ operatorlarynda tirkeldi. Baǵanyń eń joǵary ósý qarqyny «Mobail Telekom-Servis» JShS men «Ksell» AQ-da tirkeldi.
SMS-taratý qyzmetine monopoliialyq joǵary baǵa belgileý belgileri boiynsha «Mobail Telekom-Servis» JShS qatysty tergep-tekserý bastaldy" - deidi vedomstvo ókilderi.
